źes smras te soṅ ṅo | bram ze mo de ’dis bdag spyos so źes gśe źiṅ des gos dri ma can gyon te khri źigs pa’i steṅ du ñal te ’dug go || bram ze de ’oṅs pa daṅ | des de mthoṅ nas smras pa | bram ze mo (3) ’di ci ñes | bram ze mos gśes te smras pa | gal te khyod lag ṅag sgo na ’greṅ ba’i mi gcig la yaṅ bza’ ba daṅ | bgo ba sbyin pa’i ’byor pa med na khyod la khyim mi mo blaṅs pas ci bya | dge sbyoṅ ’char ka gaṅ yin pa des kho mo spyos so || bram zes smras pa | bzaṅ mo de (4) ni bram ze mdun na ’don gyi bu las rab tu byuṅ ba yin gyis de la bzod par gyis śig | bram ze mos smras pa | gal te de gson na kho mo mi gson no || bram zes smras pa | bzaṅ mo de ni ko sa lar byuṅ ba’i rgyal po gsal rgyal gyi chuṅ po grogs | btsun mo phreṅ ldan ma’i slob (5) dpon yin te | de dag gis rgyal po las gźon nu’i yoṅs su spaṅ ba thob pas | gal te bdag gis de la sdug bsṅal cuṅ zad bskyed par gyur na | bdag cag rgyal pos phyag sbal du bcug pas ’chi bar bya dgos pa gaṅ yin pa de lta bu’i gnas yod par ’gyur gyis bzod par (6) gyis śig | bram ze mos smras pa | bram ze maṅ du smras te ci ruṅ | gal te de gson na kho mo mi gson no || ’dod pa sten pas ni sdig pa’i las mi bya ba ci yaṅ med pas bram ze de ral gri mchan du bcug ste ’phags pa daṅ | tshe daṅ ldan pa ’char kas thag riṅ po kho na (7) nas de mthoṅ na | de sems ji lta bus ’oṅ sñam na | ji tsam na gsod pa’i sems kyis ’oṅ bar mthoṅ nas | tshe daṅ ldan pa ’char kas lo ma ma yin pa’i spyil bu mṅon par sprul nas der źugs te ’dug go | bram ze des smras pa | btsun pa ’char ka sgo phye śig | tshe (53a1) daṅ ldan pa ’char kas smras pa | khyod skyes bzaṅ pos ’oṅs par gyur na | kho bos ci’i phyir sgo mi dbye | ral gri bor cig | bram zes bsams pa | bgags te gsad do sñam nas des ral gri bor ro || tshe daṅ ldan pa ’char kas smras pa | sdig pa’i sems de (2) yaṅ bor cig | bram ze des bsams pa | ’di ni bdag ñid chen po źig ste | bdag gi sems kyaṅ śes so sñam nas de mṅon par gyur pa daṅ | tshe daṅ ldan pa ’char kas rdzu ’phrul mṅon par ’du bya ba de phyir bsdus nas de bźin du ’dug go | bram ze des tshe daṅ (3) ldan pa ’char ka’i rkaṅ ba gñis la phyag ’tshal te chos mñan pa’i phyir mdun du ’dug pa daṅ | tshe daṅ ldan pa ’char kas de’i bsam pa daṅ | bag la ñal daṅ | khams daṅ raṅ bźin khoṅ du chud nas | ’di ltar bram ze des stan de ñid la ’dug bźin du ’jig tshogs la lta (4) ba’i ri’i rtse mo ñi śu mtho ba ye śes kyi rdo rjes bcom ste | rgyun du źugs pa’i ’bras bu mṅon du byas pa de ltar chos bstan to || des bden pa mthoṅ nas smras pa | btsun pa bdag gis dge ba’i bśes gñen btsun pa ’char ka la brten nas btsun pa ’char kas bdag la (5) gaṅ mdzad pa ’di lta bu ni bdag la phas kyaṅ ma bgyis | mas kyaṅ ma bgyis | rgyal pos kyaṅ ma bgyis | lha rnams kyis kyaṅ ma bgyis | sṅon gyi pha mes dag gis kyaṅ ma bgyis | dge sbyoṅ daṅ bram ze dag gis kyaṅ ma bgyis | byams pa daṅ | mdza’ bśes daṅ | (6) rtsa lag gi tshogs kyis kyaṅ ma bgyis te | khrag daṅ mchi ma’i rgya mtsho ni bskams | rus pa’i ri dag las ni bsgral | ṅan soṅ gi sgo dag ni bkum | mtho ris daṅ thar pa’i sgo dag ni phye | sems can dmyal ba daṅ | dud ’gro daṅ | yi dgas dag nas ni rkaṅ pa phyuṅ | lha daṅ (7) mi rnams kyi naṅ du ni bźag | ’khor ba ni mthar bgyis | thog ma ma mchis pa’i dus nas bsags pa’i ’jig tshogs la lta ba’i ri’i rtse mo ñi śu mtho ba ye śes kyi rdo rjes bcom ste rgyun du źugs pa’i ’bras bu ni thob ste | btsun pa bdag ni mṅon par źugs pa lags so || btsun (53b1) pa bdag ni mṅon par źugs pa lags te | btsun pa bdag bcom ldan ’das daṅ | chos daṅ | dge sloṅ gi dge ’dun la skyabs su mchi yis | bdag dge bsñen du gzuṅ du gsol | deṅ slan chad nas ji srid ’tsho’i bar du glo ba thag pa nas rab tu daṅ bas skyabs su mchi’o || (2) de nas bram ze des smras pa | btsun pa ’char ka khyod bdag gi sdum par byon tam | son to | btsun pa ’char kas bdag gi bram ze mo la ji skad bka’ stsal | tshe daṅ ldan pa ’char kas smras pa | kho bos de la ’di skad ces |

.