|| gsuṅ gi don gaṅ yin pa de ni bstan pa yin pas na gsuṅ la bstod pa’i ’og tu bstan pa la bstod pa bśad par bya ste | bgrod pa gcig daṅ thabs bde daṅ | | legs par (5)’brel daṅ ñes pa med | | thog ma bar daṅ mthar dge ba | | khyod kyi bstan ’dra gźan la med | | bgrod pa gcig daṅ thabs bde daṅ | | źes bya ba la sogs pa smos pa la | | gaṅ gis bgrod pas na bgrod pa ste bgrod pa ni lam mo | | gcig kyaṅ yin la bgrod pa yaṅ yin pas na bgrod pa gcig (6)ste | bstan pa źes ’chad par ’gyur ro | | lta ba rnam par dag bya’i phyir | | lam ’di las ni gźan pa med | | ces mdo las bśad pa’o | | lam gcig kho na yin te | | dper na de bźin gśegs pa’i bstan pa źes bśad do | | yaṅ na thar pa gcig pu kho na thob par bya ba’i phyir (7)bgrod pa ni bgrod pa gcig pa’o | | gcig gis bgrod pa źes pa ni drug pa’i bsdu ba’o | | śiṅ śa ba’i lo ma daṅ ’dra ba’i mdo las ji ltar gsuṅs pa ni chos gaṅ źig mṅon par śes pa daṅ | yaṅ dag par byaṅ chub pa daṅ | mya ṅan las ’das pa’i phyir yaṅ dag par ’jug (151b1)pa de rnams ñid kyis mkhyen ciṅ mṅon par rdzogs par saṅs rgyas nas bśad do źes bya ba’o | | thabs bde źes bya ba la thabs ni sbyar ba’o | | gduṅs pa la sogs pa’i dka’ ba’i dka’ thub dgag pa’i phyir thabs bde ba gaṅ la yod pa de ni thabs bde ba ste | bde ba daṅ ldan pas (2)sems mñam par gźag par ’gyur ro źes mdo’i tshig yin pa’i phyir ro | | ji srid thar pa ma thob pa de srid du lha daṅ mi rnams kyi ’bras bu legs par ’brel ba’i ṅaṅ tshul gaṅ la yod pa de ni legs par ’brel ba dan ldan pa’o | | ñes pa ni skyon te | ’dod chags la sogs (3)pa’i ñes pa daṅ mi ldan pa’i phyir na ñes pa med pa’o | | thog ma ni thos pa’i dus daṅ | bar ma ni bsam pa’i dus daṅ | tha ma ni bsgom pa’i dus su dge ba ste | mṅon par mtho ba daṅ | ṅes par legs pa’i mtshan ñid daṅ ldan pa’o | | de’i rgyur gyur pa’i phyir thog ma bar daṅ mthar dge (4)ba ni bstan pa’o | | khyod kyi ’dra ba gźan la med pa ni draṅ sroṅ ser skya daṅ | pe lu ka daṅ | gcer bu pa la sogs pa rnams kyis bstan pa’o | | ’di la ni rnam pa thams cad du bsten pa’i rigs so |