de bzhin gshegs pa mthong nas kyang lus kyi las yongs su dag pa bcu ’thob par ’gyur te || bcu gang zhe na | ’di lta ste | tshor bas sems kun tu ma zin par ’chi ba’i dus byed pa dang | de mig ’khrul par mi ’gyur ba dang | lag pa g.yob par mi byed pa dang | rkang pa ’phra bar mi byed pa dang gcig mi gtor ba dang | phyi sa mi ’byung ba dang | de’i snying kar rdul mi ’byung ba dang | khu tshur mi ’chang ba dang | nam mkha’ la mi snyegs pa dang | ji ltar ’dug pa de bzhin du tshe’i ’du byed ’dor bar ’gyur ba ste | lus kyi las yongs su dag pa bcu po de dag ’thob par ’gyur ro ||
ngag gi las yongs su dag pa bcu ’thob par ’gyur te || bcu gang zhe na | ’di lta ste | gdangs snyan pa’i tshig dang | mnyen pa’i tshig dang | ’jam pa’i tshig dang | dga’ ba’i tshig dang | snum pa’i tshig dang | slar bzlog pa ma yin pa’i tshig dang | gzung bar ’os pa’i tshig dang | btsun pa’i tshig dang | lha dang mis yongs su gzung ba’i tshig dang | sangs rgyas kyis yongs su gzung ba’i tshig ste ngag gi las yongs su dag pa bcu po de dag ’thob par ’gyur ro ||
yid kyi las yongs su dag pa bcu thob par ’gyur te || bcu gang zhe na | ’di lta ste | khro bar mi ’gyur ba dang | ’khon du ’dzin pa med pa dang | ’chab par mi ’gyur ba dang | ’tshig par mi ’gyur ba dang | nyes pa la mi dga’ ba dang | ’khon gcugs la mi dga’ ba dang | ’du shes phyin ci log tu mi ’gyur ba dang | spong ba la bag yod par ’gyur ba dang | ma zhum pa’i sems kyis sangs rgyas kyi zhing yongs su dag pa ’dzin pa dang | nga rgyal dang che ba’i nga rgyal med par sangs rgyas kyi chos thams cad mngon par sgrub pa’i ting nge ’dzin thob par ’gyur ba ste | yid kyi las yongs su dag pa bcu po de dag ’thob par ’gyur ro ||
de la ’di skad ces bya ste | tshor bas nyen cing ’chi ba’i dus mi byed || de yi mig la ’khrul par ’gyur ba med | | lag pa mi g.yo ba rkang pa ’phra mi ’gyur || de ni bshang gci gtor bar yong mi ’gyur | | de yi snying khar rdul yang ’byung mi ’gyur || khu tshur mi ’chad nam mkhar snyegs mi ’gyur | | ’dug bzhin bde ba’i ’chi ba’i dus byed de || lus las yongs su dag pa ’di bcu ’thob | | gdangs snyan phun sum tshogs shing ’jam mnyen tshig || snum zhig yid ’ong de bzhin dga’ bar ’gyur | | gzhan gyis slar mi bzlog cing gzung ’os tshig || skye bos btsun par bya ba’i tshig tu ’gyur | | de yi tshig ni lha dang klu ngag dang || mi ’am ci dang de bzhin rgyal bas bsngags | | nges bshad pa yi don kyang ’dzin byed de || des ni ngag las dag pa de dag ’thob | | khro ba med cing ’khon du ’dzin pa med || brtan pa ’chab pa med cing ’tshig pa med | | nyes la mi dga’ ’khon gcugs dga’ ba med || de yi ’du shes phyin ci log mi ’gyur | | bslab pa yang dag blangs la sems mi zhum || spong ba la ni bag med mi ’gyur te | | zhum pa med pa’i sems kyis zhing spyod byed || nga rgyal las kyang nga rgyal yongs spangs nas | | ting ’dzin ’byor pa thams cad mngon bsgrubs shing || yid kyi mngon par bsgrubs pa’i chos rnams ’thob | | chos rnams ’di dag ldan par gyur pa la || sangs rgyas dngos po dkon par mi ’gyur ro ||
’od srung gang la la bde ba’i yo byad thams cad kyis da la bkur sti byed par ’dod pa dang mchod pa thams cad kyis mchod pa thams cad kyis mchod par ’dod pa des dkon mchog brtsegs pa chen po’i chos kyi rnam grangs ’di gzung bar bya | kun chub par bya | yi ger bri bar bya | bklag par bya | bcang bar bya’o || ’od srung de ltar na de bzhin gshegs pa dgra bcom pa yang dag par rdzogs pa’i sangs rgyas rnams la mchod pa bla na med pa byas par ’gyur ro ||
bcom ldan ’das kyis de skad ces bka’ stsal nas || tshe dang ldan pa ’od srung chen po dang | byang chub sems dpa’ sems dpa’ chen po sangs rgyas kyi zhing sna tshogs nas ’dus pa de dag dang | dge slong de dag dang | lha dang | mi dang | lha ma yin dang | dri zar bcas pa’i ’jig rten yi rangs te | bcom ldan ’das kyis gsungs pa la mngon par bstod do || || ’phags pa dkon mchog brtsegs pa chen po’i chos kyi rnam grangs le’u stong phrag brgya pa las ’od srung gi le’u zhes bya ste bzhi bcu rtsa gsum pa rdzogs so || || rgya gar gyi mkhan po dzi na mi tra dang | shī len dra bo dhi dang | zhu chen gyi lo ts+tsha ba ban de ye shes sdes bsgyur cing zhus te skad gsar chad kyis kyang bcos nas gtan la phab pa || ||