'jam dpal (6)gźan yaṅ sems can gaṅ dag bdag gi bsṅags pa brjod ciṅ phrag dog gis gźan dag la mi sñan par brjod pa yod de | bdag la bstod ciṅ gźan la smod pa'i sems can de dag ṅan soṅ gsum po dag tu lo stoṅ phrag maṅ por sdug bsṅal myoṅ bar 'gyur ro ||
de dag (7)lo stoṅ phrag du ma 'das nas de nas śi 'phos nas ba laṅ daṅ | rta daṅ | rṅa mo daṅ | boṅ bu la sogs pa dud 'gro'i skye gnas rnams su skye bar 'gyur | lcug lcag daṅ | dbyug lcag rnams kyis brdeg pa daṅ | bkres pa daṅ | skom pas lus ñen pa daṅ | (278a1)khal chen po bkal te lam du 'gro bar 'gyur ro ||
gal te brgya la mi'i skye ba rñed na yaṅ rtag tu rigs dma' ba rnams kyi naṅ du skye bar 'gyur | bran tu 'gyur źiṅ gźan gyi dbaṅ du 'gyur ro ||
gaṅ dag sṅon mir gyur pa na bcom ldan 'das (2)de bźin gśegs pa sman gyi bla bai ḍū rya'i 'od de'i mtshan thos par gyur pa de dag ni dge ba'i rtsa pa des sdug bsṅal thams cad las yoṅs su thar bar 'gyur |
dbaṅ po rno bar 'gyur | mkhas pa daṅ | gsal ba daṅ | yid gźuṅs pa daṅ | dge ba yoṅs (3)su btsal ba la mṅon par brtson pa daṅ | rtag tu dge ba'i bśes gñen daṅ 'grogs pa rñed par 'gyur | bdud kyi źags pa gcod pa daṅ | ma rig pa'i sgo ṅa'i sbubs gcog pa daṅ | ñon moṅs pa'i chu kluṅ skems par 'gyur | skye ba daṅ | rga śi (4)daṅ | mya ṅan daṅ | smre sṅags 'don pa daṅ | sdug bsṅal pa daṅ | yid mi bde ba daṅ | 'khrug pa rnams las yoṅs su thar bar 'gyur ro ||