bcom ldan ’das go cha chen po bgos pa go cha chen po bgos pa źes bgyi ba ’di (5) gsuṅs na | bcom ldan ’das ci tsam gyis na byaṅ chub sems dpa’ sems dpa’ chen po go cha chen po bgos pa lags | bcom ldan ’das kyis bka’ stsal pa | rab ’byor ’di la byaṅ chub sems dpa’ sems dpa’ chen po ’di sñam du bdag gis sems can gźal du med pa yoṅs su (6) mya ṅan las bzla bar bya’o bdag gis sems can graṅs med pa yoṅs su mya ṅan las bzla’o sñam la | gaṅ gis gaṅ yoṅs su mya ṅan las bzlas pa’i sems can de dag kyaṅ yod pa ma yin no sñam ste | des sems can de sñed pa de dag yoṅs su mya ṅan las zlo bar byed la gaṅ (7) yoṅs su mya ṅan las bzlas pa daṅ gaṅ gis yoṅs su mya ṅan las bzlas pa’i sems can yaṅ ’ga’ yaṅ yod pa ma yin no ||