bcom ldan ’das kyis bka’ stsal pa | kau śi ka de bas kyaṅ rigs kyi bu ’am rigs kyi bu mo ’di bsod nams ches maṅ du skyed de | gaṅ śes rab kyi pha rol tu phyin pa ’di la mṅon par dad de rtog ciṅ mos la sems daṅ bas (35b1) byaṅ chub tu sems bskyed nas | lhag pa’i bsam pas ñan pa daṅ ’dzin pa daṅ ’chaṅ ba daṅ klog pa daṅ kun chub par byed pa daṅ rab tu ’don pa daṅ ston pa daṅ ñe bar ston pa daṅ luṅ ’bogs pa daṅ kha ton byed pa daṅ gźan dag la yaṅ rgya cher yaṅ dag par ston pa daṅ | ’di’i (2) don rnam par ’grel pa daṅ yid kyis rjes su rtog pa daṅ ci lta bur grub pa’i śes rab kyis ’dir yoṅs su dpyod par byed pa daṅ | saṅs rgyas kyi tshul rgyun chad par ma gyur cig dam pa’i chos nub par ma gyur cig ces dam pa’i chos yun riṅ du gnas par bya ba daṅ | tshul (3) daṅ ma bral bas byaṅ chub sems dpa’ sems dpa’ chen po rnams la phan gdags pa bsgrub pa byas par ’gyur bar chuṅ ṅu na glegs bam du chud par byas te ’chaṅ ṅam bźag la śes rab kyi pha rol tu phyin pa de la me tog daṅ bdug pa daṅ dri daṅ phreṅ ba daṅ byug pa daṅ phye ma daṅ | (4) na bza’ daṅ gdugs daṅ rgyal mtshan daṅ dril bu daṅ ba dan dag daṅ khor yug tu mar me’i phreṅ ba dag daṅ mchod pa rnam pa maṅ po dag gis mchod par byed de | bkur stir byed bla mar byed rjed par byed mchod par byed ri mor byed bsñen bkur byed na kau śi ka rigs kyi bu ’am rigs kyi bu mo (5) ’di ñid de bas ches bsod nams kyi phuṅ po maṅ du bskyed do ||