kau śi ka ’dzam bu’i gliṅ ’di rin po che sna bdun gyi raṅ bźin gyi mchod rten de bźin (7) gśegs pa’i riṅ bsrel gyi sñiṅ po can rnams kyis yoṅs su gaṅ ba lta źog | kau śi ka yaṅ gal te gliṅ chen po bźi pa’i ’jig rten gyi khams na sems can ji sñed yod pa de dag thams cad las sems can re res rin po che sna bdun gyi raṅ bźin gyi mchod rten de bźin gśegs (36b1) pa’i riṅ bsrel gyi sñiṅ po can re re byed du bcug ste | de dag la nam ’tsho ba’i bar du lha’i me tog daṅ lha’i bdug pa daṅ lha’i dri daṅ lha’i phreṅ ba daṅ lha’i byug pa daṅ lha’i phye ma daṅ lha’i na bza’ daṅ lha’i gdugs daṅ lha’i rgyal mtshan daṅ lha’i dril bu daṅ lha’i ba dan dag daṅ khor (2) yug tu lha’i mar me’i phreṅ ba dag daṅ lha’i mchod pa rnam pa maṅ po dag gis mchod par byed de | bkur stir byed bla mar byed rjed par byed mchod par byed ri mor byed bsñen bkur byed na | kau śi ka de ci sñam du sems | ci sems can de dag thams cad de’i gźi las bsod (3) nams maṅ du bskyed dam | brgya byin gyis gsol pa | bcom ldan ’das maṅ ṅo bde bar gśegs pa maṅ ṅo | bcom ldan ’das kyis bka’ stsal pa | kau śi ka de bas kyaṅ rigs kyi bu ’am rigs kyi bu mo ’dis bsod nams ches maṅ du skyed de | gaṅ śes rab kyi pha (4) rol tu phyin pa ’di la mṅon par dad de rtog ciṅ mos la sems daṅ bas byaṅ chub tu sems bskyed nas | lhag pa’i bsam pas ñan pa daṅ ’dzin pa daṅ ’chaṅ ba daṅ klog pa daṅ kun chub par byed pa daṅ rab tu ’don pa daṅ ston pa daṅ ñe bar ston pa daṅ luṅ ’bogs pa daṅ kha ton (5) byed pa daṅ | gźan dag la yaṅ rgya cher yaṅ dag par rab tu ston pa daṅ ’di’i don rnam par ’grel pa daṅ yid kyis rjes su rtog pa daṅ ci lta bur grub pa’i śes rab kyis ’dir yoṅs su dpyod par byed pa daṅ | saṅs rgyas kyi tshul rgyun chad par ma gyur cig dam pa’i chos nub par ma (6) gyur cig ces dam pa’i chos yun riṅ du gnas par bya ba daṅ | tshul daṅ ma bral bas byaṅ chub sems dpa’ sems dpa’ chen po rnams la phan gdags pa bsgrub pa byas par ’gyur bar chuṅ ṅu na glegs bam du chud par byas te ’chaṅ ṅam bźag la | śes rab kyi pha rol tu phyin pa (7) de la me tog daṅ bdug pa daṅ dri daṅ phreṅ ba daṅ byug pa daṅ phye ma daṅ na bza’ daṅ gdugs daṅ rgyal mtshan daṅ dril bu daṅ ba dan dag daṅ khor yug tu mar me’i phreṅ ba dag daṅ mchod pa rnam pa maṅ po dag gis mchod par byed de | bkur stir byed bla mar byed rjed par byed mchod (37a1) par byed ri mor byed bsñen bkur byed na | kau śi ka rigs kyi bu ’am rigs kyi bu mo ’di ñid de’i gźi las bsod nams ches maṅ du bskyed do ||