bcom ldan ’das kyis bka’ stsal pa | kau śi ka de bas kyaṅ rigs kyi bu ’am rigs kyi bu mo ’di ches bsod nams maṅ du skyed de | gaṅ śes rab kyi pha rol tu phyin pa ’di chuṅ ṅu na glegs bam du yaṅ chud par byas nas (6) mṅon par daṅ pas mṅon par daṅ pa la | rab tu rtog pas rab tu rtog pa la | lhag par mos pas lhag par mos pa la | sems daṅ pas sems daṅ ba la | lhag pa’i bsam pa phun sum tshogs pas lhag pa’i bsam pa phun sum tshogs pa la | byaṅ chub tu sems bskyed (7) pas byaṅ chub tu sems bskyed pa’i byaṅ chub sems dpa’ la | lhag pa’i bsam pas byin nam | chuṅ ṅu na bri ba daṅ klag pa la yaṅ sñom las med par bsgrub pa daṅ | brtson pas de la ’dzin du ’jug pa daṅ yaṅ dag par ston pa daṅ yaṅ dag par ’god pa daṅ yaṅ dag (62a1) par gzeṅs stod pa daṅ yaṅ dag par rab tu dga’ bar byed pa daṅ | tshig gis mtshon pa daṅ rnam par mtshon pa daṅ rjes su mtshon pa daṅ de’i don yaṅ dag par ston pa daṅ | de la ’di skad du rigs kyi bu khyod tshur śeg byaṅ chub sems dpa’i lam ’di la slobs (2) śig | khyod kyis lam ’di la bslabs śiṅ spyad de ’bad na myur du bla na med pa yaṅ dag par rdzogs pa’i byaṅ chub mṅon par rdzogs par ’tshaṅ rgya bar ’gyur ro ||