byams pa yaṅ byaṅ chub sems dpa’ sems dpa’ chen po gaṅ gis thams cad nas thams cad du soṅ ba’i phyogs bcu’i ’jig rten na stoṅ gsum gyi stoṅ chen po’i ’jig rten gyi khams gźal du med pa’i gźal du med pa | (6) graṅs med pa’i graṅs med pa | tshad med pa’i tshad med pa | bsam gyis mi khyab pa’i bsam gyis mi khyab pa | mtha’ yas mu med pa yod pa rnams kyi phyogs re re’i stoṅ gsum gyi stoṅ chen po’i ’jig rten gyi khams re rer ’das pa’i dus na gźal du med pa’i gźal du med pa | (7) graṅs med pa’i graṅs med pa | tshad med pa’i tshad med pa | bsam gyis mi khyab pa’i bsam gyis mi khyab pa | mtha’ yas mu med pa’i de bźin gśegs pa dgra bcom pa yaṅ dag par rdzogs pa’i saṅs rgyas | lam chad pa ’jug pa chad pa | spros pa daṅ srid par (76b1) ’dren pa chad pa mchi ma zad pa tsher ma bcom pa khur śin tu bor ba bdag gi don rjes su thob pa srid par sbyor ba yoṅs su zad pa yaṅ dag par kun śes pas sems śin tu rnam par grol ba sems thams cad kyi dbaṅ dam pa’i pha rol tu son pa | phuṅ po lhag ma med pa’i mya ṅan las (2) ’das pa’i dbyiṅs su yoṅs su mya ṅan las ’das pa de dag gi sems daṅ po bskyed pa nas bzuṅ ste bla na med pa yaṅ dag par rdzogs pa’i byaṅ chub mṅon par rdzogs par saṅs rgyas pa’i bar daṅ | phuṅ po lhag ma med pa’i mya ṅan las ’das pa’i dbyiṅs su yoṅs su mya ṅan las (3) ’das pa’i bar daṅ | dam pa’i chos nub par ma gyur pa’i bar te | de dag gi bar gyi saṅs rgyas bcom ldan ’das de rnams kyi tshul khrims kyi phuṅ po daṅ tiṅ ṅe ’dzin gyi phuṅ po daṅ śes rab kyi phuṅ po daṅ rnam par grol ba’i phuṅ po daṅ rnam par grol ba’i ye śes gzigs (4) pa’i phuṅ pa daṅ | pha rol tu phyin pa drug daṅ ldan pa’i dge ba’i rtsa ba gaṅ dag yin pa dag daṅ | saṅs rgyas kyi yon tan phun sum tshogs pa daṅ ldan pa’i dge ba’i rtsa ba rnams daṅ | stobs daṅ mi ’jigs pa’i pha rol tu phyin pa daṅ ldan pa’i dge ba’i rtsa ba daṅ | de bźin (5) du mṅon par śes pa’i pha rol tu phyin pa daṅ ldan pa daṅ yoṅs su śes pa’i pha rol tu phyin pa daṅ ldan pa daṅ | smon lam gyi pha rol tu phyin pa daṅ ldan pa daṅ | thams cad mkhyen pa’i ye śes phun sum tshogs pa daṅ ldan pa’i dge ba’i rtsa ba gaṅ yin pa rnams daṅ | phan par (6) bźed pa gaṅ yin pa daṅ byams pa chen po gaṅ yin pa daṅ sñiṅ rje chen po gaṅ yin pa daṅ saṅs rgyas kyi yon tan gźal du med pa graṅs med pa gaṅ yin pa daṅ | bla na med pa yaṅ dag par rdzogs pa’i byaṅ chub gaṅ yin pa daṅ | bla na med pa yaṅ dag par rdzogs pa’i byaṅ chub (7) kyi bde ba gaṅ yin pa daṅ | chos thams cad la dbaṅ phyug gi pha rol tu phyin pa gaṅ yin pa daṅ | zil gyis mnon pa dpag tu med pa daṅ thams cad zil gyis non pa’i rdzu ’phrul mṅon par ’du byed pa’i mchog gaṅ yin pa daṅ | sgrib pa med pa ma chags pa thogs pa med pa (77a1) mñam pa med pa mi mñam pa daṅ mñam pa dpe med pa dpag tu med pa de bźin gśegs pa’i yaṅ dag pa ci lta ba’i ye śes kyi stobs gaṅ yin pa daṅ stobs kyi naṅ na saṅs rgyas kyi ye śes kyi stobs gaṅ yin pa daṅ | saṅs rgyas kyi ye śes daṅ gzigs pa (2) gaṅ yin pa daṅ | stobs bcu’i pha rol tu phyin pa gaṅ yin pa daṅ | mi ’jigs pa bźi mchog tu yoṅs su rdzogs par khoṅ du chud pa gaṅ yin pa daṅ | chos thams cad don dam par mṅon par sgrub pas chos khoṅ du chud pa gaṅ yin pa daṅ | chos kyi ’khor lo rab tu (3) bskor ba gaṅ yin pa daṅ | chos kyi sgron ma thogs pa daṅ chos kyi rṅa rduṅ ba daṅ chos kyi duṅ ’bud pa daṅ chos kyi duṅ sgrogs pa daṅ chos kyi ral gri ’debs pa daṅ chos kyi char ’bebs pa daṅ chos kyi mchod sbyin sbyin pa daṅ chos kyi sbyin pas sems can thams cad yaṅ dag par tshim (4) par mdzad ciṅ yaṅ dag par stobs pa daṅ | gaṅ yaṅ chos bstan pa de dag daṅ saṅs rgyas kyi chos rnams sam raṅ saṅs rgyas kyi chos rnams sam ñan thos kyi chos rnams la | gaṅ dag btul ba daṅ bslabs pa daṅ mos par gyur pa daṅ ṅes par gyur pa daṅ rdzogs pa’i byaṅ (5) chub la gźol bar gyur pa gaṅ dag yin pa de dag thams cad kyi dge ba’i rtsa ba gaṅ yin pa rnams daṅ | saṅs rgyas bcom ldan ’das de dag gis byaṅ chub sems dpa’ sems dpa’ chen po gaṅ dag bla na med pa yaṅ dag par rdzogs pa’i byaṅ chub tu luṅ bstan pa de dag gi pha (6) rol tu phyin pa drug daṅ ldan pa’i dge ba’i rtsa ba gaṅ yin pa rnams daṅ | gaṅ zag raṅ saṅs rgyas kyi theg pa can gaṅ dag raṅ saṅs rgyas kyi byaṅ chub la luṅ bstan pa de dag thams cad kyi dge ba’i rtsa ba gaṅ yin pa rnams daṅ | gaṅ zag ñan thos kyi theg pa can rnams kyi sbyin pa (7) las byuṅ ba’i bsod nams bya ba’i dṅos po daṅ tshul khrims las byuṅ ba’i bsod nams bya ba’i dṅos po daṅ bsgoms pa las byuṅ ba’i bsod nams bya ba’i dṅos po gaṅ yin pa daṅ | slob pa’i zag pa med pa’i dge ba’i rtsa ba gaṅ yin pa rnams daṅ | mi slob pa’i zag pa med (77b1) pa’i dge ba’i rtsa ba gaṅ yin pa rnams daṅ | so so’i skye bo gaṅ dag gis chos de dag la dge ba’i rtsa ba bskrun pa rnams daṅ | saṅs rgyas bcom ldan ’das de dag gi ’khor bźi po dge sloṅ rnams daṅ dge sloṅ ma rnams daṅ dge bsñen rnams daṅ dge bsñen ma rnams kyi sbyin pa las (2) byuṅ ba’i bsod nams bya ba’i dṅos po daṅ tshul khrims las byuṅ ba’i bsod nams bya ba’i dṅos po daṅ bsgoms pa las byuṅ ba’i bsod nams bya ba’i dṅos po gaṅ yin pa rnams daṅ | der saṅs rgyas bcom ldan ’das chos ston pa de dag la lha daṅ klu daṅ gnod sbyin daṅ dri za daṅ lha ma (3) yin daṅ nam mkha’ ldiṅ daṅ mi ’am ci daṅ lto ’phye chen po daṅ mi daṅ mi ma yin pa gaṅ dag daṅ byol soṅ gi skye gnas su soṅ ba’i sems can gaṅ de dag thams cad kyis dge ba’i rtsa ba bskrun pa gaṅ yin pa rnams daṅ | saṅs rgyas bcom ldan ’das de dag yoṅs su mya ṅan las ’da’ ba (4) la yaṅ gaṅ gis dge ba’i rtsa ba bskrun pa gaṅ dag yin pa daṅ | saṅs rgyas bcom ldan ’das de dag yoṅs su mya ṅan las ’das pa la yaṅ gaṅ gis dge ba’i rtsa ba bskrun pa gaṅ dag yin pa daṅ | saṅs rgyas bcom ldan ’das la brten pa daṅ chos la brten pa daṅ dge ’dun (5) rnams la brten pa daṅ yid kyis bsgoms pa’i gaṅ zag dag la brten nas dge ba’i rtsa ba bskrun pa gaṅ yin pa’i dge ba’i rtsa ba de dag thams cad ma lus śiṅ lus pa med par gcig tu mṅon par bsdus te bsdoms śiṅ gźal nas rjes su yi raṅ ba’i mchog gis rjes su yi raṅ ste | dam pa daṅ (6) gtso bo daṅ rab daṅ rab mchog daṅ gya nom pa daṅ bla ma daṅ bla na med pa daṅ goṅ na med pa daṅ mñam pa med pa daṅ mi mñam pa daṅ mñam pa’i rjes su yi raṅ bas rjes su yi raṅ la de ltar rjes su yi raṅ nas rjes su yi raṅ ba daṅ ldan pa’i bsod nams bya ba’i dṅos po de bla na med pa yaṅ dag par rdzogs (7) pa’i byaṅ chub tu yoṅs su bsṅo’o źes bla na med pa yaṅ dag par rdzogs pa’i byaṅ chub sgrub par gyur cig sñam pas ṅag tu brjod par bya ba yin te | de la gaṅ zag byaṅ chub sems dpa’i theg pa can dag dṅos po gaṅ dag daṅ dmigs pa gaṅ dag daṅ rnam pa gaṅ dag gis yoṅs su (78a1) bsṅo źiṅ sems de skyed pa na cig dṅos po de dag daṅ dmigs pa de dag daṅ rnam pa de dag ci ltar mtshan mar byas pa de bźin du dmigs sam | de skad ces smras pa daṅ | byaṅ chub sems dpa’ sems dpa’ chen po byams pas gnas brtan tshe daṅ ldan pa rab (2) ’byor la ’di skad ces smras so ||