de nas bcom ldan ’das kyis gnas gtsaṅ ma’i ris kyi lha’i (6) bu la sogs te lha’i bu de dag thams cad la bka’ stsal pa | lha’i bu dag stoṅ gsum gyi stoṅ chen po’i ’jig rten gyi khams gaṅ g’i kluṅ gi bye ma sñed dag gi sems can thams cad bla na med pa yaṅ dag par rdzogs pa’i byaṅ chub tu yaṅ dag par źugs pa rnams kyi bla na med pa (7) yaṅ dag par rdzogs pa’i byaṅ chub thob par bya ba’i don du sbyin pa byin pa’i bsod nams mṅon par ’du byed pa lta źog | lha’i bu dag rnam graṅs ’dis stoṅ gsum gyi stoṅ chen po’i ’jig rten gyi khams gaṅ g’i kluṅ gi bye ma sñed gźan dag daṅ gźan dag na sems can gaṅ dag (90b1) yod pa de dag thams cad kyaṅ bla na med pa yaṅ dag par rdzogs pa’i byaṅ chub tu smon lam btab ste byaṅ chub tu sems bskyed nas | stoṅ gsum gyi stoṅ chen po’i ’jig rten gyi khams gaṅ g’i kluṅ gi bye ma sñed gźan dag daṅ gźan dag gi sems can thams cad la chos gos (2) daṅ bsod sñoms daṅ mal cha daṅ na ba’i gsos sman daṅ yo byad daṅ bde bar sbyar ba thams cad daṅ bde ba reg par gnas pa thams cad kyis | byaṅ chub sems dpa’ re res kyaṅ bskal pa gaṅ g’i kluṅ gi bye ma sñed du ’dug ste sbyin pa byin źiṅ | de bźin du dmigs (3) pa’i ’du śes can de dag thams cad kyis kyaṅ sbyin pa byin pa’i bar daṅ | rnam graṅs ’dis sems can de rnams thams cad daṅ byaṅ chub sems dpa’ de rnams thams cad re re nas yoṅs su brtags nas | byaṅ chub sems dpa’ re re nas byaṅ chub sems dpa’ de rnams (4) thams cad kyi bar gyis bskal pa gaṅ g’i kluṅ gi bye ma sñed du ’dug ste | sems can de dag thams cad la chos gos daṅ bsod sñoms daṅ mal cha daṅ na ba’i gsos sman daṅ yo byad daṅ bde bar sbyar ba thams cad daṅ bde ba la reg par gnas pa thams cad kyis rim gror byed ciṅ (5) sbyin pa de yaṅ dmigs pa’i ’du śes kyis byin la | byaṅ chub sems dpa’ sems dpa’ chen po śes rab kyi pha rol tu phyin pa daṅ thabs mkhas pas yoṅs su zin pa źig gis | ’das pa daṅ ma byon pa daṅ da ltar byuṅ ba’i saṅs rgyas bcom ldan ’das rnams daṅ byaṅ chub sems (6) dpa’ daṅ raṅ saṅs rgyas daṅ gaṅ zag ñan thos kyi theg pa can de rnams kye tshul khrims kyi phuṅ po daṅ tiṅ ṅe ’dzin gyi phuṅ po daṅ śes rab kyi phuṅ po daṅ rnam par grol ba’i phuṅ po daṅ rnam par grol ba’i ye śes mthoṅ ba’i phuṅ po daṅ | de la sems can gźan dag gis kyaṅ dge ba’i rtsa ba (7) dag bskrun pa daṅ skrun par ’gyur ba daṅ skrun par byed pa de dag thams cad gcig tu bsdus śiṅ bsdoms te gźal nas ma lus par byas te | ma lus pa la rjes su yi raṅ ba’i mchog gis rjes su yi raṅ źiṅ dam pa daṅ gtso bo daṅ rab daṅ mchog rab daṅ gya nom pa daṅ bla ma daṅ (91a1) bla na med pa daṅ goṅ na med pa daṅ goṅ ma’i yaṅ goṅ ma daṅ mñam pa med pa daṅ | mi mñam pa daṅ mñam pa daṅ rab tu mñam pa med pa daṅ bsam gyis mi khyab pa’i rjes su yi raṅ bas rjes su yi raṅ la | rjes su yi raṅ nas rjes su yi raṅ ba daṅ ldan pa’i (2) bsod nams bya ba’i dṅos po bla na med pa yaṅ dag par rdzogs pa’i byaṅ chub sgrub par gyur cig ces bla na med pa yaṅ dag par rdzogs pa’i byaṅ chub tu yoṅs su bsṅo na rjes su yi raṅ pa yoṅs su bsṅo ba daṅ ldan pa’i bsod nams bya ba’i dṅos po ’di la byaṅ chub sems dpa’ dmigs (3) pa’i ’du śes can dag gi bsod nams mṅon par ’du byed pa sṅa ma des brgya’i char yaṅ ñe bar mi ’gro | stoṅ gi char yaṅ brgya stoṅ gi char yaṅ bye ba’i char yaṅ bye ba brgya’i char yaṅ bye ba stoṅ gi char yaṅ bye ba brgya stoṅ gi char yaṅ bye ba khrag khrig brgya stoṅ gi char yaṅ ñe bar mi ’gro’o ||