bcom ldan ’das de bźin gśegs pa rin chen ’byuṅ gnas kyis bka’ stsal pa | rigs kyi bu de ltar de’i dus la bab (7) par śes na soṅ śig | de nas de bźin gśegs pa rin chen ’byuṅ gnas kyis byaṅ chub sems dpa’ sems dpa’ chen po ’od zer kun nas ’byuṅ ba la pad mo rin po che sna tshogs kyi rgyu las byuṅ ba | gser gyi mdog can ’dab ma stoṅ daṅ ldan pa stoṅ (9b1) bskur te | rigs kyi bu bcom ldan ’das de bźin gśegs pa dgra bcom pa yaṅ dag par rdzogs pa’i saṅs rgyas śkya thub pa de la | bcom ldan ’das sñun mi mṅa’ ’am | gnod pa ma mchis sam | zo bdog bde’am | sku ñams daṅ ldan nam | (2) bde ba daṅ dgyes par spyod dam źes ’dri ste | pad mo gser gyi mdog can ’dab ma stoṅ daṅ ldan pa ’di dag kyaṅ | bcom ldan ’das de bźin gśegs pa rin chen ’byuṅ gnas kyis | bcom ldan ’das la mchod pa’i slad du bskur ro źes kyaṅ gyis la (3) pad mo ’di dag gis gtor cig | rigs kyi bu saṅs rgyas kyi źiṅ der bag yod par spyod cig | de ci’i phyir źe na | ’jig rten gyi khams der skyes pa’i byaṅ chub sems dpa’ sems dpa’ chen po de dag ni mgu bar dka’ ba yin gyis | der ñams par gyur (4) ta re | de nas byaṅ chub sems dpa’ sems dpa’ chen po ’od zer kun nas ’byuṅ bas | bcom ldan ’das de bźin gśegs pa dgra bcom pa yaṅ dag par rdzogs pa’i saṅs rgyas rin chen ’byuṅ gnas de las | pad mo gser gyi mdog can ’dab ma stoṅ (5) daṅ ldan pa de dag glaṅs te | byaṅ chub sems dpa’ khyim pa daṅ | rab tu byuṅ ba daṅ | khye’u daṅ bu mo’i gzugs su ’dug ba bye ba khrag khrig brgya stoṅ du ma daṅ ’grogs te | saṅs rgyas kyi źiṅ de nas mi snaṅ bar gyur nas | śar phyogs kyi saṅs rgyas bcom (6) ldan ’das gaṅ ji sñed bźugs śiṅ ’tsho skyod ba de dag thams cad la | me tog daṅ | spos daṅ | bdug spos daṅ | phreṅ ba daṅ | byug ba daṅ | phye ma daṅ | na bza’ daṅ | rgyan daṅ | gdugs daṅ | rgyal mtshan daṅ | bdan dag gis rim gror bya ba daṅ | bkur stir bya ba (7) daṅ | bsti staṅ du bya ba daṅ | mchod pa byed ciṅ | byaṅ chub sems dpa’i rdzu ’phrul chen po daṅ | byaṅ chub sems dpa’i mthu chen pos | bcom ldan ’das de bźin gśegs pa dgra bom pa yaṅ dag par rdzogs pa’i saṅs rgyas śkya thub pa gaṅ na ba der (10a1) doṅ ste phyin nas | bcom ldan ’das kyi źabs gñis la spyi bos phyag ’tshal te phyogs gcig tu ’khod do ||