gsol pa | (75b1) bcom ldan ’das byaṅ chub sems dpa’ sems dpa’ chen po’i saṅs rgyas kyi mig yoṅs su dag pa gaṅ lags | bcom ldan ’das kyis bka’ stsal pa | śa ra dwa ti’i bu byaṅ chub sems dpa’ sems dpa’ chen po byaṅ chub kyi sems kyi rjes (2) la | rdo rje lta bu’i tiṅ ṅe ’dzin la mñam par bźag nas | rnam pa thams cad mkhyen pa ñid thob par byed de de ni de bźin gśegs pa’i stobs bcu daṅ ldan pa yin | mi ’jigs pa bźi daṅ | so so yaṅ dag par rig pa bźi daṅ | saṅs (3) rgyas kyi chos ma ’dres pa bcwo brgyad daṅ | byams pa chen po daṅ | sñiṅ rje chen po daṅ | dga’ ba chen po daṅ | btaṅ sñoms chen po daṅ | saṅs rgyas kyi rnam par thar pa bsgribs pa med pa daṅ ldan pa yin | de ni de’i mig ste | byaṅ chub (4) sems dpa’ sems dpa’ chen po’i mig de daṅ ldan pas | rnam pa thams cad du ma mthoṅ ba ’am | ma thos pa ’am | ma śes pa’am | khoṅ du ma chud pa gaṅ yaṅ med de | śa ra dwa ti’i bu ’di ni byaṅ chub sems dpa’ sems dpa’ chen po bla na med (5) pa yaṅ dag par rdzogs pa’i byaṅ chub tu mṅon par saṅs rgyas pa’i saṅs rgyas kyi mig yoṅs su dag pa’o ||