Seyyathāpi, āvuso Kaccāna, telappadīpassa jhāyato telam pi parisuddhaṃ vaṭṭi pi parisuddhā, so telassa pi parisuddhattā vaṭṭiyā pi parisuddhattā na andhandhaṃ viya jhāyati, -- evam eva kho, āvuso Kaccāna, idh’ ekacco bhikkhu parisuddhābhāni pharitvā adhimuccitvā viharati, tassa kāyaduṭṭhullam pi suppaṭippassaddhaṃ hoti, thīnamiddham pi susamūhataṃ hoti, uddhaccakukkuccam pi suppaṭivinītaṃ hoti; so kāyaduṭṭhullassa pi suppaṭippassaddhattā thīnamiddhassa pi susamūhatattā uddhaccakukkuccassa pi suppaṭivinītattā na andhandhaṃ viya jhāyati.