thams cad mkhyen pa’i ye śes kyi yul gyi bar du khoṅ du chud par bya ba daṅ | ’di (6) ltar byaṅ chub sems dpa’i sa bcu brtsams pa rab tu thob par bya ba daṅ |

śes bya thams cad la sgrib pa med pa śes pa’i phyir saṅs rgyas kyi mthar thug par byed pa’i ’jug pa ni gaṅ gi phyir | thams cad mkhyen pa’i ye śes kyi bar du khoṅ du chud par bya ba’i phyir źes (4) gsuṅs pa’o || ’jug pa ’di rnams kyi bye brag bstan pa’i phyir | miṅ gźan smos kyi rtsa ba’i ’jug pa ni ma yin no ||
bcu pa la sogs pa bstan pa thams cad la yan lag daṅ ñe ba’i yan lag gi sgo nas rnam pa drug drug gis bśad par rig par bya ste | dṅos po ñe bar dgod pa ni ma gtogs te | (5) der phuṅ po daṅ khams daṅ skye mched kyi dṅos po ñe bar dgod pa ma gtogs so źes bya ba’i tha tshig go || rnam pa drug po dag gaṅ źe na | yan lag daṅ | ñe ba’i yan lag daṅ | mtshan ñid ’dra ba daṅ | mtshan ñid mi ’dra ba daṅ | ’du ba daṅ | rgyas pa’o || de la yan lag ni ’jug pa’o || (6) ñe ba’i yan lag ni gźan rnams te | de la brten pa’i phyir daṅ | de yoṅs su rdzogs par byed pa’i phyir ro || de gñis kyi ’jug pa ñid kyi phyir mtshan ñid daṅ ’dra ba ñid do || rnam pa gźan ñid kyi phyir mtshan ñid mi ’dra ba ñid do || ’du ba ni mdor bsdus pa ste | yan lag bstan pa’i phyir ro || rgyas (7) pa ni de rab tu dbye ba ste | ñe ba’i yan lag bstan pa’i phyir te | ’jig rten gyi khams ’jig pa daṅ chags pa bźin no || bcu pa gźan la yaṅ de bźin ñid du ci rigs par sbyar bar bya’o || de gaṅ dag bźi par ston par ’don pa daṅ | gaṅ dag gsum par ston par ’don pa gñis ka yaṅ ’dir de (106b1) ñid kyi phyir kho na yin par rig par bya’o || bcu pa gñis pa daṅ gsum pa la yaṅ de ñid kyi phyir yod do || bcu pa gñis pa la gaṅ ’di byaṅ chub sems dpa’i sa bcu po dag la rtsom źiṅ thob par bya ba’i phyir źes bya bas ni rtsom źiṅ thob pa’i rtsa ba bstan to || de la rtsom pa ni dad pa daṅ | ’dun pa daṅ | ñe (2) bar ’gro ba la sogs pa ste | yoṅs su tshol ba’o || ’thob pa ni sa bcu po de dag ’dzin pa’o || yaṅ na luṅ daṅ rtogs pa ste | go rims bźin no || ’dir ni rnam graṅs goṅ ma ñid yin par rig par bya’o ||