phan tshun gcig la gcig lta źiṅ || kun kyaṅ rim gro bcas par gnas ||
sbraṅ rtsi ji ltar (3) spaṅ min pa || de ltar bdud rtsi mchog kyaṅ ’dod ||

thams cad gus daṅ bcas gnas śiṅ || phan tshun gcig la gcig lta ste ||
sbraṅ ma’i sbraṅ rtsi bdud (4) rtsi ’dra || spaṅ bar bya min ’dod pa bźin ||

ci’i phyir caṅ mi smra bar ’gyur źe na | byaṅ chub sems dpa’ rnams ni chos btsun par ’dzin pa ste | skom par gyur pa rnams kyis bskul bas chos btsun par bya ba’i phyir ro ||
ci’i phyir rnam par grol ba’i zla bas thog ma ñid du bskul ba brtsams śe (5) na | de ni ’khor de’i gtso bo yin pa daṅ | gźan du cal col du ’gyur ba daṅ | ’khor de yaṅ ’dus par ’gyur ba’i phyir ro ||
ci’i phyir tshigs su bcad pa’i dbyaṅs kho na źe na | yi ge ñuṅ du dag gis don maṅ du bsdu ba’i phyir daṅ | bstod pa dag ni phal cher tshigs su bcad de byed pa’i phyir ro ||
(6) tshigs su bcad pa lṅas ci źig yoṅs su bstan źe na | ’chad pa po daṅ ñan pa po rnams la skyon gaṅ yod na | bśad pa’i ’os ma yin pa’i skyon med pa ñid ston to ||
de la ’chad pa po la skyon med pa ni | kun du rtog pa dag gyur pa || źes bya bas ston to ||
ñan pa po chos mthun pa po rnams ni rnam (7) par ṅes pa ñid kyi phyir daṅ | ñan ’dod pa’i phyir ro ||
gźan dag ni sems rab tu daṅ ba’i phyir te | ’di’i naṅ na gaṅ su yaṅ ruṅ ’os su ma gyur la | ma grags pa de gcig kyaṅ med do źes bstan pa’i phyir | thams cad gus daṅ bcas gnas śiṅ || phan tshun gcig la gcig lta ste || źes (114a1) bya bas gsuṅs so ||
de la źal nas gsuṅs ba’i tshigs su bcad pa’i gźuṅ ni phal cher dub pas gźuṅ gaṅ gis de śes pa rnams kyis don de dmigs pa ñid gźuṅ yin no ||
kun du rtog pa dag gyur pa || dran daṅ ye śes yon tan ldan || sa mchog (2) brjod nas ci yi phyir || khyab bdag rab tu bśad mi bgyi || źes bya ba la | ci’i phyir kun du rtog pa dag par ’gyur ba ñid kyis ston źe na | kun du rtog pa rnams bśad pa’i rgyu yin pa’i phyir ro ||
kun du rtog pa rnams ni rnam par rtog pa rnams te | de dag ni gaṅ du byed pa’o ||
de’i (3) phyir bśad pa’i rgyu ni dag par gyur na ci’i phyir mi ’chad ces gsol ba ’debs so ||
kun du rtog pa dag pa de yaṅ gñen po yoṅs su ’dzin pa daṅ | ñes pa daṅ bral ba gñis kyis rab tu phye ba yin te | de la dran daṅ ye śes ldan pa ñid kyis ni kun du rtog pa ñon moṅs pa can rnams daṅ | (4) gźi de las byuṅ ba’i ’du śes rnams kyi gñen po yoṅs su ’dzin pa ston to ||
dran pa ñe par gźag pa rnams ni kun du rtog pa ñon moṅs pa can gyi gñen po ste | de dag ni dran pa smos pas ston to ||
de bźin ñid la dmigs pa’i ye śes ni mtshan ma med pa’i phyir gźi de las ’byuṅ ba’i ’du (5) śes kyi gñen po ste | de ni ye śes smos pas ston to ||
lhag ma rnams kyis ni ñes pa daṅ bral ba ston to ||
de la gaṅ gis ’chad par mi ’gyur ba’i ñes pa ni rnam pa gsum ste | phrag dog daṅ | ser sna daṅ | chos ’chad pa na le lo ñid daṅ | sboms pa med pa’o ||
de la phrag dog ni | (6) gźan dag gis śes pa mi bzod pa’o ||
ser sna ni sems kyis kun du ’dzin pa’o ||
de la yon tan ldan pa ñid kyis khro ba med pa la sogs pa’i yon tan daṅ ldan pas ñes pa daṅ po med par ston to ||
sa brjod nas źes bya bas ni ñes pa gñis pa med par ston to ||
khyab bdag ces bya bas ni (7) ñes pa gsum pa med par ston to ||
de ltar kun du rtog pa dag pa rnam pa gñis kyis ’chad pa po bstod nas ñan pa po rnams la bstod pa rtsom ste | ’di kun rnam par ṅes pa ste || byaṅ chub sems dpa’ grags chen ldan || ci phyir khyod kyis sa brjod nas || rnam par dbye ba bśad mi bgyi || (114b1) źes bya ba’o ||
rnam par ṅes pa źes bya ba ni mkhas pa ste | blo byaṅ ba dag go ||
rnam par ṅes pa ñid de yaṅ rnam pa gsum du rig par bya ste | byaṅ chub chen por smon lam ’debs pas rgya chen po la rnam par ṅes pa ñid daṅ | gźan dag gi de bźin du yid ches pas rnam par grags par (2) rnam par ṅes pa ñid daṅ | ’chad pa po de ñid kyis de khoṅ du chud pas yoṅs su zin par rnam par ṅes pa ñid do ||
de dag ni byaṅ chub sems dpa’ ñid daṅ | grags pa chen po daṅ ldan pa ñid daṅ | sa brjod pa ñid kyis go rims bźin du bstan to ||
rnam par ṅes su zin kyaṅ don du (3) gñer ba ma yin na ’chad pa’i snod du mi ’gyur te | de’i phyir | rgyal ba’i sras po ’di dag kun || ñan par ’dod pa źes bya bas gsuṅs so ||
luṅ la rnam par ṅes pa ñid yin gyi rtogs pa la rnam par ṅes pa ñid ma yin pa daṅ | don lkog tu gyur pa ñid yin te | don lkog tu gyur (4) pa ñid ma yin par ma gyur na bśad pa’i snod yoṅs su rdzogs par mi ’gyur te | de’i phyir de gñis ka bstan pa’i phyir | ’jigs pa med ces bya ba gsuṅs te | chos mthoṅ ba daṅ | don lkog tu ma gyur pa ni ’jigs pa med par ’gyur ro ||
de bas na snod yoṅs su rdzogs pa de dag rig (5) nas | sa rnams dag gi don gyi tshul || yaṅ dag phye ste bśad pa mdzod || ces bya bas bskul ma ’debs so ||
de ltar ’khor chos mthun pa rnam par ṅes pa daṅ | don du gñer ba’i yon tan gñis kyis bstod nas de las gźan pa dag la bstod do ||
’khor ’di śin tu rnam daṅs te || le lo (6) med ciṅ mdzes daṅ ldan || dag pa’i sñiṅ por rab gnas pa || yon tan ye śes śin tu ldan || źes bya ba’o ||
de la śin tu rnam daṅs źes bya ba ni dag pa ste | rñog pa can ma yin pa dag go ||
de la gaṅ med na śin tu rnam par dag par ’gyur ba’i rñog pa rnam pa drug ste | don du mi gñer brñog pa daṅ | (7) spyod lam rñog pa daṅ sgrib pa rñog pa daṅ | klan ka tshol ba daṅ | de skad rgol ba las thar bar bya ba’i bsam pa daṅ ldan pas bsam pa rñog pa daṅ | gaṅ gis bśad pa de la mṅon par mi dga’ ba ste | dge ba’i rtsa bsam brtan bsam brtan pa rñog pa daṅ | blun pa la sogs pas gti lug rñog pa ste | (115a1) de dag gi gñen por rñog pa med pa rnam pa drug yod par rig par bya’o ||
de la sñiṅ por rab gnas pa || źes bya ba ni bstan pa ’di ni sgrub pa sñiṅ por byed pa’o ||
le lo med pa daṅ | mdzes pa daṅ ldan pa daṅ | dag pa daṅ | sñiṅ po la rab tu gnas pa daṅ | yon tan (2) daṅ ldan pa daṅ | ye śes daṅ ldan pa źes bya ba tshig drug po de dag gis ni de dag go rims bźin du yoṅs su bstan to || de ltar tshigs su bcad pa gñis kyis ni raṅ gi rigs yoṅs su dag pa bstan | gcig gis ni rigs gźan yoṅs su dag pa bstan nas de gñis ñid kyi phan tshun lta ba yoṅs (3) su dag pa ste | thams cad gus daṅ bcas gnas śiṅ || phan tshun gcig la gcig lta ste ||źes bya ba’o ||
de la gus bcas źes bya ba ’dis ni phan tshun lta ba de ñid ñon moṅs pa can ma yin par ston te | chos la gus pas byas kyi de phrag dog gis byas pa ni ma yin no ||
sbraṅ ma’i sbraṅ (4) rtsi bdud rtsi ’dra || spaṅ bar bya min ’dod pa bźin || źes bya ba ’dis ni gus pa de ñid kyi mchog ston te | ’di ltar ṅo mi chod pas lta ba ma yin pa’o ||
tshigs su bcad pa ’di la phan tshun lta ba ni yan lag go ||
phan tshun lta ba ñon moṅs pa can ma yin pa ni ñe ba’i yan lag go ||
gźan dag la (5) yaṅ de bźin du daṅ po ni yan lag yin la | lhag ma ni ñe ba’i yan lag yin par rig par bya’o ||
mtshan ñid ’dra ba daṅ | mtshan ñid mi ’dra ba daṅ | ’du ba daṅ rgyas pa yaṅ sṅa ma bźin no ||