kye | rgyal ba’i sras | (3) ’khor ’di ni byaṅ chub sems dpa’ sems dpa’ chen po chos ’di dag la bsam pa śin tu sbyaṅs pa | kun tu rtog pa yoṅs su sbyaṅs pa | spyad par bya ba śin tu spyad pa | tshogs (4) śin tu bsags pa | saṅs rgyas bye ba khrag khrig brgya stoṅ śin tu bsñen bkur ba | yon tan daṅ ye śes tshad med pa daṅ ldan pa | the tshom daṅ nem nur med pa | ñon moṅs pa daṅ | (5) bral ba | mos pa daṅ lhag pa’i bsam pa la rab tu gnas pa | gźan gyi driṅ mi ’jog pa śa stag tshogs pas yoṅs su dag pa yin gyi | kye | rgyal ba’i sras | de bźin gśegs (6) pa’i byin gyis legs par bśad pa mdzod cig daṅ | byaṅ chub sems dpa’ ’di dag thams cad ni rnam par ’di lta bu’i gnas zab mo la mṅon sum du gnas pa śa stag go |

kye rgyal ba’i sras kyi ma ’khor ’di ni śin tu yoṅs su dag pa ste | byaṅ chub sems (2) dpa’ lhag pa’i bsam pa śin tu yoṅs su sbyaṅs pa | kun du rtog pa śin tu yoṅs su sbyaṅs pa | spyad par bya ba śin tu yoṅs su spyad pa | saṅs rgyas bye ba phrag maṅ po la bsñen bkur byas pa | tshogs śin tu bsags pa | yon tan dpag tu med pa daṅ ldan pa | yid gñis daṅ | (3) nem nur daṅ bral ba | ñon moṅs pa med pa | lhag pa’i bsam pa daṅ mos pa la rab tu gnas pa | saṅs rgyas kyi chos ’di dag la gźan gyi driṅ mi ’jog pa śa stag tshogs pa ste | de bas na kye rgyal ba’i sras byaṅ chub sems dpa’ ’di dag ni gnas ’di la mṅon sum du gnas pa śa (4) stag yin gyi legs par bśad par mdzod cig ces bya ba la |
ci’i phyir ’phags pa rnam par grol ba’i zla bas ’khor de dag bstod ce na | gal te ’di lta bu de dag ’jig rten na dkon yaṅ | ’khor ’di na mod do źes bstan pa’i phyir ro ||
de la lhag pa’i bsam pa śin tu yoṅs su sbyaṅs pa (5) źes bya ba ni yan lag go ||
lhag pa’i bsam pa śin tu yoṅs su sbyaṅs pa de ni rnam pa gñis su rig par bya ste | luṅ yoṅs su dag pa daṅ | rtogs pa yoṅs su dag pa’o ||
de la luṅ yoṅs su dag pa yaṅ rnam pa lṅa ste | ji ltar ’dod pa’i luṅ thob par bya ba’i thabs la kun du rtog pa’i (6) phyir ’dun pa yoṅs su dag pa ni gaṅ gi phyir | kun du rtog pa śin tu yoṅs su sbyaṅs pa źes gsuṅs pa’o ||
de thob par bya ba daṅ mthun pa’i lus daṅ ṅag gi spyad pa spyod pas kun du tshol ba yoṅs su dag pa ni gaṅ gi phyir spyad par bya ba śin tu spyad pa źes gsuṅs pa’o ||
thos pa phyin ci ma (7) log pa maṅ po yun riṅ por ’dzin pas ’dzin pa yoṅs su dag pa ni gaṅ gi phyir | saṅs rgyas bye ba phrag maṅ po la bsñen bkur byas pa źes gsuṅs pa’o ||
smon lam gyi khyad par gyis phyi ma phyi mar tshe rabs khyad par du ’phags pas dran pa’i khyad par thob pa’i phyir skye bas thob pa yoṅs su (117b1) dag pa ni gaṅ gi phyir | tshogs śin tu bsags pa źes gsuṅs pa’o ||
khoṅ du chud par bya ba la brtson pa dge ba gaṅ yin źes tshol ba na ’dod pa chuṅ ba la sogs pa’i yon tan maṅ po daṅ ldan pas sbyor ba yoṅs su dag pa ni gaṅ gi phyir | yon tan dpag tu med pa daṅ ldan pa źes (2) gsuṅs pa’o ||
rtogs pa yoṅs su dag pa ni rnam pa bźi ste | mṅon sum gyi śes pas śin tu rnam par ṅes pa’i phyir rab tu rtogs pa yoṅs su dag pa ni gaṅ gi phyir | yid gñis daṅ nem nur daṅ bral ba źes gsuṅs pa’o ||
bsgom pa’i lam na ñe ba’i ñon moṅs pa thams cad mi (3) ’byuṅ bas | ñon moṅs pa rab tu mi rgyu ba yoṅs su dag pa ni gaṅ gi phyir | ñon moṅs pa med pa źes gsuṅs pa’o ||
theg pa dman pa ni mi ’dod kyi goṅ ma’i khyad par thob par ’dod pas chog par mi ’dzin pa yoṅs su dag pa ni gaṅ gi phyir | lhag ba’i bsam pa daṅ mos pa la rab tu (4) gnas pa źes gsuṅs pa’o ||
de la lhag pa’i bsam pa ni dad pa daṅ ’dun pa’o ||
mos pa ni de dag gi dmigs pa la yon tan du ’dzin ba’o ||
mthar phyin par ’gro ba la bdag ñid kyis yaṅ dag par źugs pas | gdams ṅag rjes su bstan pa la gźan la rag ma las pa yoṅs (5) su dag pa ni gaṅ gi phyir | saṅs rgyas kyi chos ’di dag la gźan gyi driṅ mi ’jog pa źes gsuṅs pa’o ||