dran daṅ dga’ (5) bas spyod dag pa || stobs bcu’i stobs kyi śugs sogs yon tan ldan pa yi ||
sa yi dam pa mchog gi rnams || tha dad yaṅ dag don mkhyen spyod pas śod ||

dran daṅ ’dzin pas rnam par dag pa’i blo || stobs bcu’i stobs thob bsam pa rnam dag pa ||
so so yaṅ dag rig pas don rnams ’byed || sa bcu phul du byuṅ ba bśad par mdzod ||
ces bya ba ste |

de dag thams cad kyis bstod pa daṅ bcas pa’i skul bas bskul to ||
de la (7) tshigs su bcad pa daṅ pos ni rtogs pa’i mthu spobs pa phun sum tshogs pa daṅ | tshigs su bcad pa gñis pas ni luṅ gi mthu phun sum tshogs pas bstod do || ’di gñis daṅ ldan na ston te | ’di ltar rtogs pa daṅ luṅ ṅo ||
de la rab mchog ñid ni yan lag ste || rab mchog ñid de (119a1) yaṅ rtogs pa’i mthu spobs pas rab tu phye ba’o || spobs pa ni gnas daṅ | raṅ bźin daṅ | ’bras bu daṅ rnam pa gsum gyis ston te | de la gnas ni ñan thos la sogs pa pas zag pa med pa’i śes rab khyad par du ’phags pa ste | dam pa dri ma med pa’i blo daṅ ldan pa’i (2) phyir ro || raṅ bźin ni dris pa luṅ bstan pa la rigs pa’i spobs pa ñid zad mi śes pa’o || ’bras bu ni yi ge daṅ don phun sum tshogs pas luṅ bstan pa ste | de la sñan pa daṅ | rgya che ba ñid kyis ni yi ge phun sum tshogs pa ñid rig bar bya’o ||
tshigs su bcad pa gñis pa la luṅ (3) gi mthu ni | dran daṅ ’dzin pas rnam par dag pa’i blo || źes bya bas bstan to || len pa daṅ ’dzin pa gñis kyis rab tu phye ba’i dran pa daṅ | ’dzin pa gñis kyis ni luṅ de la de’i blo dri ma med pa ston te nem nur med pa’i phyir ro || de ltar rtogs pa daṅ luṅ gi nus pas bstod nas | (4) gźan dag kyaṅ rtogs par bya ba’i phyir daṅ | luṅ du bya ba’i phyir bśad par gsol ba btab ste | sa la źugs pa rnams ni de bźin gśegs pa’i stobs rtogs par bya ba daṅ | sa la ma źugs pa rnams ni sa la ’jug pa rtogs par bya ba’i phyir te | rtogs par bya ba ni de lta bu’o ||
(5) luṅ du bya ba ji lta bu źe na | don rnam par ’byed par ’gyur ba’i sa rnams ’dzin pa’i phyir ro ||
so so yaṅ dag rig pas źes bya ba ni luṅ daṅ rtogs pa las skyes pa’i raṅ gi nus pa dag gis so ||