de phyir sa yi ye śes lam (5) mchog bstan par gyis || gnas daṅ rgyud daṅ ’phro ba rim gyis rab tu śod ||
spyod daṅ yul daṅ chos daṅ ye śes tshul rnams kyi || chos kyi tshul yaṅ ’gro ba kun la phan phyir (6) śod ||

ye śes sa yi lam gyi mchog || ’jug daṅ gnas daṅ ’phar ba daṅ ||
spyod pa ñid kyi yul rnams ni || go rims bźin du legs par śod ||

de la tshigs su bcad (7) pa daṅ po daṅ | gñis pas ni gaṅ dag gis byin gyis brlabs pa daṅ | gaṅ gi phyir byin gyis brlabs pa de dag gi bsṅags pa mdzad na ni byin gyis brlabs pa ste | ci źig ston źe na | gtso bo rnams kyis ma bsgos sam | mchog gi las byed du ma bcug na | de byed par mi ’gyur (122a1) ro || de la tshigs su bcad pa daṅ pos gaṅ dag gis byin gyis brlabs pa’i bsṅags pa ji ltar rig par bya źe na | gaṅ gi phyir | lha daṅ mi yi naṅ na mchog rnams kyis || byin rlabs mdzad ces gsuṅs pa’o | lha daṅ mi’i mchog gaṅ yin źe na | saṅs rgyas (2) bcom ldan ’das rnams so || ci’i phyir źe na | chos kyi rgyal por gyur pa’i phyir ro ||
ji ltar de dag chos kyi rgyal po ñid yin par rig par bya źe na | rgyal po’i phun sum tshogs pa ni rnam pa bźi ste | dbaṅ phun sum tshogs pa daṅ | mthu phun sum tshogs pa daṅ | źabs ’briṅ (3) phun sum tshogs pa daṅ | rigs phun sum tshogs pa’o || saṅs rgyas rnams kyi dbaṅ phun sum tshogs pa gaṅ źe na | ñon moṅs pa daṅ śes bya’i sgrib pa las rnam par grol ba ste | des de dag sems daṅ ye śes la dbaṅ brñes nas | ji ltar bźed pa bźin du bde bar (4) gnas pa bla na med pa sku ñams su bstar to || de ’dir ji skad du bstan pa yin źe na | thams cad mkhyen pa’i phyir mi mñam pa daṅ mñam pa ñid do || bag chags daṅ bcas pa’i ñon moṅs pa legs par bcom pas | ’jig rten gyi chos kyis mi gos pa’i phyir | nam mkha’ daṅ mñam (5) pa ñid do || mi mñam pa ni saṅs rgyas rnams te | de las gźan pa’i sems can rnams daṅ ṅo | mi mñam pa de dag daṅ mñam pa ni de dag ni chos kyi skus mñam pa’o || mi mñam pa rnams źes ci’i phyir de skad mi bya źe na | de dag ni mñam pa ñid du bstan pa’i phyir ro || saṅs (6) rgyas rnams kyi mthu phun sum tshogs pa gaṅ źe na | stobs bcu rnams te | de rnams kyis ni de dag gis gźan smra ba daṅ | bdud phyir rgol ba thams cad zil gyis gnon to ||
de ’dir ji skad bstan pa yin źe na | stobs bcu’i khyu mchog ñid kyis so || saṅs rgyas rnams kyi źabs (7) ’briṅ ba phun sum tshogs pa gaṅ źe na | byaṅ chub sems dpa’ rnams daṅ | ñan thos ris bdun gyis bsdus pa rnams so || de ’dir ji skad du bstan pa yin źe na | tshogs rab mtha’ yas pa ñid kyis so || de ni byaṅ chub sems dpa’ la sogs pa’i tshogs rnams so || rab ni ’jig (122b1) rten las khyad par du ’phags pa’i phyir ro ||
de dag mtha’ yas pa ni graṅs med pa’i phyir ro || saṅs rgyas rnams kyi rigs phun sum tshogs pa gaṅ źe na | gaṅ rigs phun sum tshogs pa’o || de ’dir ji skad du bstan pa yin źe na | śākya’i rigs skyes pa ñid kyis so ||
ci’i phyir (2) bcom ldan ’das ñid kyis rigs brjod ce na | mṅon sum ñid kyi phyir daṅ | ’di ñid kyi phyir chos la byin gyis brlabs so źes sbyar ba’i phyir ro || chos la źes bya ba ni chos la gnas pa źes bya bar dgoṅs pa’o ||
de la byin gyis brlabs pa mdzad ces bya ba ni yan lag go || byin gyi rlabs (3) de yaṅ rnam pa gñis su rig par bya ste | gnas phun sum tshogs pa’i byin gyis brlabs pa ni saṅs rgyas kyis byin gyis brlabs pa yin pa’i phyir ro || ’bras bu phun sum tshogs pa’i byin gyis brlabs pa ni chos smra ba ’bras bu yin pa’i phyir ro ||
lha daṅ mi yi mchog rnams źes bya ba ni yan lag (4) go ||
lhag ma ni ñe ba’i yan lag go ||
’o na tshigs su bcad pa gñis pas gaṅ gi phyir byin gyis brlabs pa de’i bsṅags pa ji ltar rig par bya źe na | chos kyi rgyal po de dag gis chos kyi mdzod rnam par ’byed par bya ba’i phyir byin gyis brlabs pa’o || ’dir chos kyi mdzod de’i bsṅags pa yaṅ (5) rnam pa gñis su rig par bya ste | don phun sum tshogs pa daṅ | tshig ’bru phun sum tshogs pa’o || don phun sum tshogs pa ji lta bu źe na | gaṅ gi phyir spyod pa dam pa rgya chen źes gsuṅs pa’o ||
spyod pa źes bya ba ni byaṅ chub sems dpa’ rnams kyi sgrub pa gaṅ yin pa ste | lam gaṅ yin (6) pa daṅ | tshogs gaṅ yin pa’o || de yaṅ don dam pa’i ye śes daṅ ldan pas dam pa’o ||
mthu’i khyad par daṅ ldan pas rgya che ba’o || de ltar ’di’i zab pa ñid daṅ | rgya che ba ñid kyaṅ yoṅs su bstan pa yin no || tshig ’bru phun sum tshogs pa ji lta bu źe na | gaṅ gi phyir ye śes sa rab phye (7) ste źes gsuṅs pa ste | ye śes kyi sa rab tu phye ba rnam pa bcu gcig po ’di dag gis so ||
tshigs su bcad pa ’di las saṅs rgyas kyi mthu ñid kyis saṅs rgyas kyi chos ston par yoṅs su bstan pa gaṅ yin pa de ni kha cig saṅs rgyas la bdag ñid la mthu med nas gźan la tshol to sñam du dbaṅ (123a1) za ba yoṅs su spaṅs pa’i phyir ro || de ltar chos bśad par bskul nas bśad na dus gsum du gźan dag gi phan yon ni tshigs su bcad pa gsum gyis ston te | ñan pa’i dus daṅ | sgrub pa’i dus daṅ | tshe rabs brjes pa’i dus so || de la ñan pa’i dus na (2) saṅs rgyas kyi byin gyis brlabs pa ñid daṅ | de bźin du byaṅ chub sems dpa’ rnams kyis kyaṅ bzuṅ ba ñid de don du na saṅs rgyas so sñam du bzuṅ ba ni phan yon no || sgrub pa’i dus nas bcu po dag mthar gyis yoṅs su rdzogs par byed ciṅ | yoṅs su rdzogs nas kyaṅ stobs bcu (3) brñes pas bdag ñid saṅs rgyas ñid du bskyed pa’o || tshe rabs brjes pa’i dus na ṅan ’gro daṅ bde ’gro mi khom par skyes pa’i klu’i ’jig rten daṅ | lha tshe riṅ po’i ’od gsal la sogs pa gzugs na spyod pa rnams kyi naṅ du yaṅ chos ’di rñed pa’o || ’di ñan pa thams cad kyis phan yon (4) ’di ’thob pa’i skal ba yod dam | smras pa ma yin no || ’o na ji lta bu źe na | the tshom med par gyur pa źes bya ba ste | ṅes pa’i chos ’di la mos pa’o || de ltar bskul ba daṅ | bśad pa’i phan yon brjod nas | ye śes sa rab phye ste źes gaṅ gsuṅs pa de dmigs pa’i go rims (5) daṅ | rtogs pa’i go rims daṅ | sgrub pa’i go rims daṅ | go rims rnam pa gsum gyis tshigs su bcad pa drug pa las luṅ stsal bar mdzad do || rtsa ba daṅ po gñis pa daṅ | bźi pa rnams kyis bstan to || go rims su śod cig ces bya ba ni thams cad du sbyar ro || de la ye śes kyi (6) sa’i khams ni sa bcu bstan pa gaṅ yin pa ste | gaṅ la dmigs gaṅ la brten nas sa de dag tu ye śes ’byuṅ ba’o || ’jug pa ni sa la ’jug pa’o || gnas pa ni ji srid dus gźan dag tu ma ’phar gyi bar du’o || ’phar ba ni sa gźan dag tu ’gro ba’o || spyod pa ni ji ltar sgrub pa ni de dag (7) ’jug pa daṅ | gnas pa daṅ ’phar ba daṅ ’grub pa’o || spyod pa de ñid kyi rgyu ba rnam pa maṅ po ni spyad pa’i yul źes bya’o || luṅ sbyin pa ’di ci dgos śe na | saṅs rgyas kyis gsuṅs pa ñid thams cad bśad do źes phyis yid ches pa bskyed pa’i phyir ro ||