ṅo bo ñid stoṅ źi źiṅ sdug bsṅal zad || rgyud las rnam grol mñam par mya ṅan ’das ||
mtha’ daṅ dbus med tshig gis brjod du med || dus gsum grol ba nam mkha’ (2) ’dra źiṅ mtshuṅs ||

de ltar ye śes phra ba gaṅ yin pa de’i mtshan ñid ji lta bu źe na |
raṅ bźin stoṅ yod gñis min zad mi śes || ’gro (124b1) las rnam grol mñam brñes mya ṅan ’das ||
mtha’ daṅ dbus min tshig gis brjod du med || dus gsum rnam las grol ba nam mkha’ mñam ||
źes gsuṅs pa’o ||
de la ye śes de’i mtshan ñid ni rnam pa gñis su rig par bya ste | spyi’i mtshan ñid daṅ | spyi’i mtshan ñid ma (2) yin pa’o || de la ye śes de’i mtshan ñid kyi spyi’i mtshan ñid ji lta bu źe na | raṅ bźin stoṅ źes gsuṅs pa ste | ye śes kyi bdag ñid kyis stoṅ pa’o || de ji ltar spyi’i mtshan ñid yin źe na | chos thams cad ni ji skad brjod pa’i raṅ bźin gyis stoṅ pa’o ||
raṅ bźin gyis stoṅ pa’o (3) źes bstan pa ci ri boṅ gi rva bźin du med do źes de ltar gzuṅ bar bya ba’am smras pa ma yin no ||
ci stoṅ pa de las ye śes gźan la de las kyaṅ stoṅ pa ñid gźan no źes de ltar gzuṅ bar bya’am | smras pa ma yin no || ci de’i raṅ bźin de yod pa las de phyis ’gyur te zad pa ’gags pa (4) źes de ltar gzuṅ bar bya’am | smras pa ma yin no || ’o na ji lta bu źe na | stoṅ pa ñid kyi raṅ bźin de ni yod pa daṅ gñis su med pa daṅ zad mi śes pa’o ||
de ltar de la yaṅ dag pa ma yin par ’dzin pa rnam pa gsum rnam par spaṅs pas stoṅ pa ñid yoṅs su bstan pa yin te | skur pa (5) ’debs pa yaṅ dag pa ma yin par ’dzin pa rnam par spaṅs pa daṅ | tha dad pa yaṅ dag pa ma yin par ’dzin pa rnam par spaṅs pa daṅ | ’gyur ba yaṅ dag pa ma yin par ’dzin pa rnam par spaṅs pa’o || gaṅ dag rab źi gñis min zad mi śes || źes ’don pa de yaṅ de rab tu źi ba yod (6) pa ñid du brjod pa yin te | med pa ni źi bar mi ’gyur ro || med pa des kyaṅ ji ltar źi bar ’gyur te | des ni ñon moṅs pa rnams rab tu źi bar byed de | ’di ni de’i spyi’i mtshan ñid do || spyi’i mtshan ñid ma yin pa ni de’i rnam par byaṅ ba’i mtshan ñid ni rnam par grol ba ñid do || de yaṅ rnam pa (7) gñis su rig par bya ste | de gaṅ las ji ltar rnam par grol ba’o ||
de gaṅ las ji ltar rnam par grol źe na | ’gro las rnam par grol źes gsuṅs pa ste | des ’gro ba daṅ ldan pa’i ñon moṅs pa daṅ | las daṅ skye ba’i kun nas ñon moṅs pa rnams las rnam par grol bar ston to || ji ltar (125a1) rnam par grol źe na | mñam brñes mya ṅan ’das źes gsuṅs pa ste | ’khor ba daṅ mya ṅan las ’das pa mñam pa ñid du ’dzin pas ñan thos ltar gcig tu ’khor ba la rgyab kyis phyogs pa ma yin no || ci ye śes de’i rgyun gyi thog mas zag pa zad par byas (2) pa źig gam | ’on te bar daṅ tha mas zag pa zad par byas śe na | de ni de ltar zag pa zad par byed pa ma yin par rig par bya’o || ’o na ji lta bu źe na | mar me’i ’od ’phro bas ras tshig pa tha ma daṅ bar mas ma yin pa bźin no ||
mtha’ smos pas ni thog ma yaṅ smos par ’gyur (3) te | sṅon gyi mtha’ yin pa’i phyir ro || ci de gźan las sgra ji lta ba bźin du dmigs su ruṅ ṅam | smras pa ma yin no ||
’o na ji lta bu źe na | tshig gis brjod du med ces bya ba ste | brjod du med pa’i phyir ro || ci de ’jig rten pa’i śes pa bźin du ’jug pa la brten pa źig gam | (4) smras pa ma yin no ||
’o na ji lta bu źe na | dus gsum rnams las grol źes bya ba ste | gnas gyur pa rtag pa la gnas pa’i phyir te | ji ltar rkyen mi rtag pa la brten pas rnam par śes pa yaṅ mi rtag pa ñid do źes mdo sde gźan dag las rnam par gźag pa lta bu ni ma yin no ||
(5) ci de ñan thos daṅ raṅ saṅs rgyas kyi ye śes ltar sgrib pa daṅ bcas pa’i rnam par grol bas rnam par grol ba źig gam | smras pa ma yin no ||
’o na ji lta bu źe na | nam mkha’ mñam źes bya ba ste | śes bya’i sgrib pa thams cad med pa’i phyir ro ||
ji ltar dmigs pa yoṅs su śes pa daṅ | (6) ji ltar ñon moṅs pa rnams spoṅ ba daṅ | dmigs pa ci ’dra ba la dmigs pa daṅ | gnas ci ’dra ba la gnas pa daṅ | rnam par grol ba ci ’dra bas rnam par grol ba de thams cad yoṅs su bstan pa yin no ||
’di la raṅ bźin gyis stoṅ pa ñid ni yan lag go || stoṅ pa ñid rnam pa gsum (7) ni ñe ba’i yan lag go || rnam par grol ba ñid ni yan lag go || rnam par grol ba rnam pa lṅa ni ñe ba’i yan lag go ||