rab ’byor yang shes rab kyi pha rol tu phyin pa ’di spong ba dang skur pa dang mi snyan par brjod pas ni ’das pa dang ma byon pa dang da ltar byung ba’i sangs rgyas bcom ldan ’das rnams kyi thams cad mkhyen pa nyid spangs par ’gyur skur (7) par ’gyur mi snyan par brjod par ’gyur te | de dag ni rang gi rgyud bcom zhing bsregs nas blo chung ba shes rab chung ba bsod nams chung ba dge ba’i rtsa ba chung ba’i gang zag dad pa tsam dang ldan pa dga’ ba tsam dang ldan pa | dang ba tsam dang ldan pa ’dun pa tsam dang ldan pa las dang po bskal ba med (101b1) pa’i rang bzhin can gzhan rnams kyi yang dad pa tsam dang dga’ ba tsam dang dad pa tsam dang ’dun pa tsam de yang phyir zlog cing ’bral bar byed ldog par byed de | ’di la bslab par mi bya’o zhes smra zhing ’di ni sangs rgyas kyi gsung ma yin no zhes tshig tu brjod par ’gyur ro ||