|| shes rab kyi pha rol tu phyin pa brgyad stong pa | bam po bcu pa | de nas lha (3) rnams kyi dbang po brgya byin ’di snyam du sems te | shes rab kyi pha rol tu phyin pa ’di rigs kyi bu ’am rigs kyi bu mo gang dag gi rna lam du snang bar ’gyur ba yang sngon gyi rgyal ba la lhag par bya ba byas par ’gyur pa dang sangs rgyas mang po la dge ba’i rtsa ba bskrun pa dang | dge ba’i bshes (4) gnyen gyis yongs su zin par ’gyur ba yin na gang dag shes rab kyi pha rol tu phyin pa ’di ltar zab pa ’di ’dzin par ’gyur ’chang bar ’gyur klog par ’gyur kun chub par byed par ’gyur rab tu ’don par ’gyur ston par ’gyur nye bar ston par ’gyur lung ’bogs par ’gyur kha ton byed par (5) ’gyur zhing bzung ba dang bcangs pa dang klags pa dang kun chub pa dang rab tu ston pa dang | bstan pa dang nye bar bstan pa dang lung ’bogs pa dang kha ton byas nas de bzhin nyid du slob pa dang de bzhin nyid du sgrub pa dang de bzhin nyid du rnal ’byor du byed par ’gyur ba lta ci smos te | de dag ni (6) dge ba’i rtsa ba ngan ngon tsam dang ldan par mi ’gyur te | rigs kyi bu dang rigs kyi bu mo de dag ni sangs rgyas mang po la bsnyen bkur byas par ’gyur ro ||