rab ’byor gzhan yang shes rab kyi pha rol tu phyin pa yi ger ’dri ba la | yul yid la byed pa dag ’byung bar ’gyur | grong dang grong khyer dang grong rdal dang ljongs dang yul ’khor dang rgyal po’i pho brang ’khor yid la byed (133a1) pa dag ’byung bar ’gyur | skyed mos tshal yid la byed pa dag ’byung bar ’gyur | bla ma yid la byed pa dag ’byung bar ’gyur | kun tu ston pa yid la byed pa dag ’byung bar ’gyur | chom rkun yid la byed pa dag ’byung bar ’gyur | lag can yid la byed (2) pa dag ’byung bar ’gyur | bi shi khā yid la byed pa dag ’byung bar ’gyur | shi bi ka yid la byed pa dag ’byung bar ’gyur | smad ’tshong yid la byed pa dag ’byung bar ’gyur | bde ba yid la byed pa dang sdug bsngal yid la byed pa dang ’jigs pa yid la byed pa dag ’byung (3) bar ’gyur | bud med yid la byed pa dang skyes pa yid la byed pa dang ma ning yid la byed pa dag ’byung bar ’gyur | mdza’ ba dang mi mdza’ ba dang ldan pa yid la byed pa dag ’byung bar ’gyur | pha ma dang ldan pa’i yid la byed pa dag ’byung bar ’gyur | spun zla dang (4) sring mo dang ldan pa’i yid la byed pa dag ’byung bar ’gyur | gnyen bshes dang ldan pa’i yid la byed pa dang grogs po dang rtsa lag dang snag gi gnyen mtshams dang ldan pa’i yid la byed pa dang | chung ma dang bu dang bu mo dang ldan pa’i yid la byed pa dang | khyim dang zas dang (5) btung ba dang ldan pa’i yid la byed pa dang gos yid la byed pa dang mal stan yid la byed pa dang | ’tsho ba’i yo byad yid la byed pa dang ’phral gyi bya ba yid la byed pa dang | ’dod chags yid la byed pa dang zhe sdang yid la byed pa dang gti mug yid la byed pa dang dus tshigs (6) yid la byed pa dang dus bzang po yid la byed pa dang dus ngan pa yid la byed pa dang | glu yid la byed pa dang sil snyan yid la byed pa dang gar yid la byed pa dang snyan dang gas dang glu tshig dang sgrung yid la byed pa dang | bstan bcos yid la byed pa dang tha snyad yid la byed pa (7) dang bzhad gad yid la byed pa dang ’jo sgeg yid la byed pa dang | mya ngan yid la byed pa dang nyon mongs pa yid la byed pa dang bdag yid la byed pa ste | rab ’byor yid la byed pa de dag dang gzhan dag kyang bdud sdig can nye bar sgrub par ’gyur te | shes rab kyi pha rol (133b1) tu phyin pa ’di ’chad pa dang ston pa dang nye bar ston pa dang ’dzin pa dang ’chang ba dang klog pa dang lung ’bogs pa dang kha ton byed pa dang chung ngu na yi ger ’dri ba la yang bar chad byed par ’gyur sems g.yeng bar byed par ’gyur te byang chub sems dpa’ sems dpa’ chen pos (2) bdud kyi las ’di dag rtogs par bya ste rtogs nas kyang spang bar bya’o ||