tshe dang ldan pa rab ’byor yang ci khyod nyan thos kyi theg pa can nam rang sangs rgyas kyi theg pa can nam theg pa chen po pa’i byang chub sems dpa’ gcig kyang yod par khas (4) mi len nam | rab ’byor gyis smras pa tshe dang ldan pa shā ri’i bu yang ci de bzhin nyid kyi de bzhin nyid gang yin pa de la nyan thos kyi theg pa can nam rang sangs rgyas kyi theg pa can nam theg pa chen po pa’i byang chub sems dpa’ gcig kyang yang dag par rjes su mthong ngam | shā ri’i bus smras pa | (5) tshe dang ldan pa rab ’byor de ni ma yin te de bzhin nyid kyang re zhig rnam pa gsum du dmigs su med na byang chub sems dpa’ lta ci smos | rab ’byor gyis smras pa tshe dang ldan pa shā ri’i bu yang ci de bzhin nyid rnam pa gcig tu yang dmigs su yod dam | shā ri’i bus smras pa tshe dang ldan pa rab (6) ’byor de ni ma yin no || rab ’byor gyis smras pa tshe dang ldan pa shā ri’i bu ci khyod kyis de bzhin nyid la byang chub sems dpa’i chos gcig kyang yang dag par rjes su mthong ngam | shā ri’i bus smras pa tshe dang ldan pa rab ’byor de ni ma yin no || rab ’byor gyis smras pa tshe dang ldan pa shā ri’i bu de ltar (7) bden pa nyid dang gnas pa nyid du byang chub sems dpa’i chos de yang dmigs su med na khyod ci’i phyir ’di snyam du ’di ni nyan thos kyi theg pa can ’di ni rang sangs rgyas kyi theg pa can ’di ni theg pa chen po pa’o snyam du sems | shā ri’i bu de ltar byang chub sems dpa’ sems dpa’ chen po de bzhin nyid (178a.1) la rab tu rnam par ’byed pa rnams khyad par med pa dang bye brag med pa dang tha dad du byar med pa nyid thos nas | byang chub sems dpa’ sems dpa’ chen po gang sems mi ’gong kun tu mi zhum phyir phyogs par mi ’gyur na | byang chub sems dpa’ sems dpa’ chen po ’di ni (2) byang chub tu nges par ’byung bar rig par bya’o ||