rab ’byor gzhan yang byang chub sems dpa’ sems dpa’ chen pos rmi lam gyi nang du grong khyer tshig pa dang grong tshig par gyur pa rmis te de rmi lam de las sad nas ’di (6) snyam du sems to | ci ltar ngas rmi lam gyi nang du rnam pa gang dang rtags gang dang mtshan ma gang dag mthong ba’i rnam pa gang dang rtags gang dang mtshan ma gang dag gis byang chub sems dpa’ sems dpa’ chen po phyir mi ldog par gzung bar bya ba’i rnam pa de dag dang rtags de dag dang (7) mtshan ma de dag nga la yod na | bden pa de dang bden pa’i tshig des grong khyer tshig pa dang grong tshig pa ’di nye bar zhi bar gyur cig bsil bar gyur cig med par gyur cig ces byas na | rab ’byor gal te grong tshig pa dang grong khyer tshig pa de nye bar zhi ba dang bsil ba dang med par gyur na (209b1) ni rab ’byor byang chub sems dpa’ sems dpa’ chen po de sngon gyi de bzhin gshegs pa dgra bcom pa yang dag par rdzogs pa’i sangs rgyas rnams kyis bla na med pa yang dag par rdzogs pa’i byang chub tu phyir mi ldog par lung bstan par rig par bya’o ||