rigs kyi bu de’i phyir khyod kyis brtson ’grus ’di nyid dang spro ba ’di nyid dang don du gnyer ba ’di nyid dang ’dod pa ’di lta bu nyid kyis rjes su ’brang zhing shar phyogs nyid du song shig dang | rigs kyi bu ’di nas dpag tshad lnga brgya na spos dang ldan pa zhes bya ba’i grong khyer rin po che (263b1) sna bdun gyi rang bzhin gyi ra ba rim pa bdun gyis bskor ba | ’obs rim pa bdun dang shing ta li ’phreng ba rim pa bdun gyis yongs su bskor ba | chur dpag tshad bcu gnyis zheng du dpag tshad bcu gnyis yod pa ’byor ba rgyas pa bde ba lo legs pa skye bo mang po dang mis gang (2) ba | bar gyi tshong khang gi phreng ba ri mo sna tshogs su bris pa lta bur blta na sdug pa phigs par gyur pa mnyam zhing mtshungs pa | skye bo dang khyogs kyi bzhon pa dang rkang gis ’gro ba’i gnas ’dzer dog med par gnas pa lnga brgya dag gis legs par bsgrubs pa | grong khyer gyi (3) khor yug tu zhol gyi phyir rin po che sna bdun gyi rang bzhin gyis bskor la | rin po che sna bdun gyi rang bzhin gyi ra ba de dag gi mda’ yab rnams ni ’dzam bu’i chu bo’i gser las byas pa | mtho zhing tshad dang ldan pa mda’ yab thams cad kyi rtse mo las kyang rin po che sna bdun gyi (4) rang bzhin gyi shing skyes te | rin po che sna tshogs bkra ba’i shing thog gi ’bras bu chags pa | mda’ yab las shing skyes pa thams cad las kyang rin po che’i rang bzhin gyi thag gu byung bas mda’ yab gnyis pa’i shing gzhan dang ’brel pa thams cad dang ldan pa’i grong khyer de gser (5) gyi dril bu g.yer ka’i dra bas khebs te | dril bu g.yer ka’i dra ba de dag la rlung gis btab na sgra ’jam zhing snyan pa yid du ’ong ba dag ’byung ba ’di lta ste | dper na yan lag lnga dang ldan pa’i rol mo sna tshogs pa | rol mo mkhan mkhas pas brdungs shing blangs na sgra (6) ’jam zhing snyan pa yid du ’ong ba dag ’byung ba de bzhin du | dril bu g.yer ka’i dra ba de dag la rlung gis btab na sgra ’jam zhing snyan pa yid du ’ong ba dag ’byung ste | sgra des sems can de dag rtse dga’ zhing dga’ mgur spyod do ||