nga la rigs kyi bu grong khyer spos dang ldan pa de’i dbus kyi bzhi mdo na byang chub sems dpa’ sems dpa’ chen po chos ’phags kyi khang pa rin po che sna bdun las byas pa khor yug tu dpag tshad kyi tshad tsam | rnam par bkra zhing blta na (264b1) sdug pa rab rim pa bdun dang ta la’i phreng ba rim pa bdun gyis yongs su bskor ba zhig yod de | khang pa de na khang pa’i longs spyad pa dang nye bar longs spyad pa dang | yongs su longs spyod pa dag rtag tu dga’ ba zhes bya ba’i skyed mos tshal dang mya ngan med ces bya ba dang mya ngan (2) bral zhes bya ba dang me tog sna tshogs pa zhes bya ba’i skyed mos tshal dang skyed mos tshal bzhi yod de | skyed mos tshal de dag re re na yang ’di lta ste | rdzing bu bzang po zhes bya ba dang bzang mchog ces bya ba dang dga’ ba zhes bya ba dang dga’ mchog ces bya ba dang bde ba zhes bya ba dang (3) bde mchog ces bya ba dang nges pa zhes bya ba dang mi ’bab pa ces bya ba brgyad brgyad yod de | yang rdzing bu de dag gi ngos gcig ni gser gyi rang bzhin | ngos gnyis pa ni dngul gyi rang bzhin | ngos gsum pa ni bai dūrya’i rang bzhin | ngos bzhi pa ni shel gyi rang bzhin | ’og (4) gi sa gzhi ni kar ge ta na’i rang bzhin la gser gyi bye ma bdal ba ste | rdzing bu de dag re re la yang them skas them pa rin po che’i rang bzhin sna tshogs rnam pa tha dad pas brgyan pa brgyad brgyad yod de | them skas de dag thams cad kyi bar nas kyang ’dzam bu’i chu bo’i gser gyi shing (5) ljon pa dag skyes so ||