2) ’jigs dang bral zhing gti mug dra ba rnam par bsal || stobs bcu rgol ba’i tshogs kyis shin tu thul bar dka’ |
| log pa’i lam zhugs pha rol tshogs skrag mdzad || seng ge lta bur bsnyengs pa mi mnga’ sa la gshegs |;

thugs rje’i dbang gis ’gro ba mtha’ dag sdug bsngal gzigs kyang, rang nyid ’jigs pa’i skabs med dam zhe na? ’jigs dang bral zhing gti mug dra ba rnam par bsal zhes bya ba la sogs pa tshigs su bcad pa gcig gis ’jigs pa bdun dang bral bar ston te, ’jigs pa dang bral ba ni yan lag go, lhag ma rnams ni nye ba’i yan lag ste, gti mug dra ba rnam par bsal zhes bya ba ni ma rig pa ’gags pas ’du byed ’gag pa nas sdug bsngal gyi phung po chen po ’ba’ zhig po ’di ’gag par ’gyur ro zhes ’byung bas rga ba dang, na ba dang, ’chi ba dang, ngan ’gror ltung ba’i ’jigs pa dang bral bar bstan to. stobs bcu ni gnas pa dang gnas ma yin pa mkhyen pa la sogs pa stobs bcu kun kyang shes rab kyi ngo bo yin te, de dag dang ldan pas ’tsho ba med pas ’jigs pa dang, tshigs su bcad pa med pas ’jigs pa gnyis dang bral bar bstan te; ’tsho’i mchog gi nang na shes rab kyi ’tsho ba ni mchog go zhes gsungs pa dang, stobs bcu dang ldan pa ni tshigs su bcad pa med pas mi ’jigs pa’i phyir ro. rgol ba’i tshogs kyis shin tu thub par dka’ ba dang, log pa’i lam zhugs pha rol tshogs skrag mdzad ces bya bas ’khor gyi nang du bag tsha bas ’jigs pa dang bral bar bstan te, mu stegs can la sogs pa phas kyi rgol bas mi thub pa dang, bdud la sogs pa log pa’i lam du zhugs pa’i tshogs skrag par mdzad pa’i phyir ro. de bas na ji ltar seng ge ni gang nas gang du ’gro yang rung, ’dug kyang rung ste, sa ’di’i steng na bag tsha ba dang ’jigs pa med pa, de bzhin du de bzhin gshegs pa thugs rje chen po dang ldan pa yang ’jigs pa bdun spangs te, ’jig rten ’di na bsnyengs pa mi mnga’ bar gshegs pa seng ge lta bur bsnyengs pa mi mnga’ sa la gshegs zhes bya’o.