de nas tshe dang ldan pa sha ra dva ti’i bus bcom ldan ’das la: legs so zhes gsol nas, bcom ldan ’das kyi ltar nyan pa dang, bcom ldan ’das kyis ’di skad ces bka’ stsal to: - sha ra dva ti’i bu, sangs (S11a) rgyas kyi zhing ’di nas shar phyogs logs su sangs rgyas kyi zhing gang gā’i klung bcu’i bye ma snyed kyi rdul phra rab kyi rdul snyed ’das pa na, ’jig rten gyi khams mi ’dzums pa zhes bya ba yod de. de na de bzhin gshegs pa, dgra bcom pa, yang dag par rdzogs pa’i sangs rgyas kun tu bzang po zhes bya ba da ltar bzhugs te, ’tsho zhing gzhes la chos kyang ston te. byang chub sems dpa’ blo gros mi zad pa de nas ’ongs so. sha ra dva ti’i bu, ’jig rten gyi khams mi ’dzums pa de na nyan thos dang rang sangs rgyas rnams kyi ming yang med de, de bzhin gshegs pa de’i dge ’dun yang byang chub sems dpa’ ’ba’ zhig ste:;

sha ra dva ti’i bu, sangs rgyas kyi zhing ’di nas zhes bya ba ni gong du shā ri’i bus ’jig rten gyi khams ’di nas ji srid cig na mchis zhus pa’i lan du bshad pa ste, mi mjed kyis sangs rgyas kyi zhing ’di nas shar phyogs logs su sangs rgyas kyi zhing ganggā’i klung bcu’i bye ma snyed kyi rdul phra rab kyi rdul snyed ’das pa de dag gi pha rol na sangs rgyas kyi zhing de gnas so zhes bya ba’i don to. ’jig rten gyi khams de’i ming ci zhes zhus pa’i lan du ’jig rten gyi khams mi ’dzums pa zhes gsungs so. de bzhin gshegs pa’i mtshan ci zhes zhus pa’i lan du kun tu bzang po zhes bya ba gsungs so. da ltar bzhugs te zhes bya ba ni spyod lam bzhis bzhugs so, ’tsho ba ni ’tsho ba’i dbang po ma btang ste mya ngan las ma ’das zhes bya ba’i don to, gzhes pa ni sems can rnams kyi don mdzad pa’o. byang chub sems dpa’ blo gros mi zad pa gang nas mchis zhes zhus pa’i lan du de nas ’ongs so zhes gsungs so. nyan thos dang rang sangs rgyas kyi ming yang med ces bya ba ni nyan thos zhes bya ba’i sgra dang rang sangs rgyas zhes bya ba’i sgra yang mi grag ces bya ba’i don to. ’o na de bzhin gshegs pa’i ’khor du su dag gnas snyam pa la byang chub sems dpa’ ’ba’ zhig ces bya ba smos te, de bzhin gshegs pa de’i ’khor yang byang chub sems dpa’ ’ba’ zhig tu zad de, gzhan med do zhes bya bar ’dod do. byang chub sems dpa’ de yang ji lta bu zhe na? sngon yongs su sbyang ba byas pa zhes bya ba la sogs pas gnas pa rnam par dag pa la rnam pa lngar phye nas bstan pa’i rgyu rnam par dag pa las brtsams nas ston to.