byang chub kyi sems kyi sbyor ba mi zad pa dang; chos sbyin pa rnam par ’grel ba’i sbyor ba mi zad pa dang; sems can yongs su smin par byed pa’i sbyor ba mi zad pa dang; dge ba’i rtsa ba bsags pa’i sbyor ba mi zad pa ste; bzhi po de dag ni sbyor ba mi zad pa’o.

yang sbyor ba bzhi ste, ’khor ba yongs su mi gtong ba’i sbyor ba dang, ’khor ba na nyon mongs pa med pa’i thabs kyi sbyor ba dang, tha dad pa’i sa bon brtas pa’i sa la sbyor ba dang, tha dad pa’i sa bon brtas pa’i rgyu la sbyor ba’o. de la byang chub kyi sems kyi sbyor ba mi zad pa zhes bya bas ’khor ba yongs su mi gtong ba’i sbyor ba bstan te, byang chub kyi sems kyis ni ’khor ba yongs su mi gtong bar byed do; byang chub kyi sems dang ldan pa rnams ’khor ba mi ’dor bar byed pa’i phyir ro. chos sbyin pa rnam par ’grel ba’i sbyor ba mi zad pa zhes bya bas ’khor ba na nyon mongs pa med pa’i thabs kyi sbyor ba bstan te, de la sbyin pa rnam pa gsum po zang zing sbyin pa dang, mi ’jigs pa sbyin pa dang, chos sbyin pa las chos sbyin pas ni sems can rnams ’khor ba na nyon mongs pa med par ’gyur bas na, chos sbyin pa ni nyon mongs pa med pa’i sbyor ba mi zad pa’o zhes bya’o. sems can yongs su smin par byed pa’i sbyor ba mi zad pa zhes bya bas tha dad pa’i sa bon brtas pa’i sa la sbyor ba bstan te, de la rnam par grol ba smin par byed pa’i shes rab bskyed pa ni yongs su smin par byed pa’o zhes bya’o, de bas na sems can gyi sems kyi rgyud la rnam par grol ba yongs su smin par byed pa’i shes rab bskyed pa ni sems can yongs su smin par byed pa’i sbyor ba mi zad pa zhes bya’o. dge ba’i rtsa ba bsags pa’i sbyor ba mi zad pa ste zhes bya bas tha dad pa’i sa bon brtas pa’i rgyu la sbyor ba bstan te, rnam par grol ba smin par byed pa’i shes rab de yang ’dod ma chags pa la sogs pa’i dge ba’i rtsa ba bsags pa las ’byung ste, de bas na ’dod ma chags pa la sogs pa’i dge ba’i rtsa ba la sogs par byed pa ni dge ba’i rtsa ba bsags pa’i sbyor ba mi zad pa zhes bya’o. rnam pa gzhan du na byang chub kyi sems kyi sbyor ba mi zad pa zhes bya ba la sogs pa bzhi tshan des don rnam pa bzhis bstan te, mi ’dod pa’i gnyen po dang, thabs mi shes pa’i gnyen po dang, shes rab med pa’i gnyen po dang, bsod nams med pa’i gnyen po ste; byang chub kyi sems kyis ni bla na med pa’i byang chub ’dod par ’gyur, chos sbyin pas ni bla na med pa’i byang chub bsgrub pa’i thabs shes par ’gyur, sems can yongs su smin par byed pas ni sems can rnams kyi sems kyi rgyud la rnam par grol ba smin par byed pa’i shes rab skyed par ’gyur, dge ba’i rtsa ba bsags pa’i sbyor bas ni sems can dge ba’i rtsa bas dbul ba rnams la bsod nams dpag tu med pa sogs pa’i phyir ro.