gzhan yang sbyor ba mi zad pa bzhi ste. bzhi gang zhe na? phung po la brtag pa’i sbyor ba mi zad pa dang; khams la brtag pa’i sbyor ba mi zad pa dang; skye mched la brtag pa’i sbyor ba mi zad pa dang; rten cing ’brel bar ’byung ba la brtag pa’i sbyor ba mi zad pa ste; bzhi po de dag ni sbyor ba mi zad pa’o.

gzhan yang sbyor ba mi zad pa bzhi ste zhes bya bas rnam grangs gzhan du sbyor ba mi zad pa bzhi bstan te, phung po rnams sgyu ma lta bur mkhas pa la sbyor ba dang, khams rnams grong stong pa lta bur mkhas pa la sbyor ba dang, skye mched rnams sbrul gdug pa’i dug bzhin du ma rungs par byed par mkhas pa la sbyor ba dang, dngos po rnams rkyen las ’byung ba yin par mkhas pa la sbyor ba ste, de la phung po lnga ni sgyu ma dang ’dra, khams bco brgyad ni bdag dang bdag gi dang bral te grong stong pa dang ’dra, mig la sogs pa’i skye mched kyis ni gzugs la sogs pa la dmigs te, ’dod chags la sogs pa skyed pa’i sgo nas rang gi dge ba’i rtsa ba srog dang ’dra ba ma rungs par byed pas skye mched ni sbrul gdug pa lta bu’i dug dang ’dra, phyi nang gi dngos po thams cad ni rgyu dang rkyen las byung ba yin no zhes phung po dang khams dang skye mched dang rten cing ’brel bar ’byung ba’i mtshan nyid de ltar shes na phung po dang, khams dang, skye mched dang, rten cing ’brel bar ’byung ba la brtag pa’i sbyor ba mi zad pa zhes bya ba go rims bzhin du sbyar ro.