mi gnas pa’i phyir, ’jig rten gyi chos rnams kyis mi gos pa dang;

shin tu dul ba’i phyir, rnyed pas dga’ ba med pa zhes bya ba la sogs pa’i tshig dgus ni ’jig rten gyi chos brgyad kyis ma gos par rab tu dbye ba dang bcas mdor bsdus pa dang bcas pa bstan to. de la shin tu dul ba ni sbyangs pa’i yon tan rnams kyi sems shin tu dul bar gyur pa yin la, rab tu zhi ba ni zhe sdang spangs pa ste, de bas na chos gos la sogs pa rnyed pas kyang dga’ ba med la ma rnyed pas khong khro ba med do; snyan pa thams cad ni byis pa slu ba phyin ci log yin par shes pas rab tu brtag pa’i phyir dang, bdag gi yon tan ma grags su zin kyang de spa gong ba’am sems zhum pa med do; blo yangs pa’i phyir go rims bzhin du snyan pa la ngo mtshar du mi ’dzin pa dang; mi snyan pas zhum par mi ’gyur ro; legs par gnas pa ni brtan por gnas pa’o; mi g.yo ba ni rang bzhin gyis mi ’dor ba ste, de ltar gyur pas smad pas kyang dmas par mi sems la, bstod pas kyang mthos par mi sems so; sems can rnams kyi don bya bar sems shing lta ba’i phyir dang khams gsum gyi ’dus byas kyi bde ba mi rtag pa’i phyir go rims bzhin du sdug bsngal gyis mi skyo ba dang; bde bas dga’ bar mi ’gyur zhes sbyar ro. rnyed pa dang ma rnyed pa la sogs pa de dag gang la yang ma chags te, mi gnas pa’i phyir, ’jig rten pa’i chos rnams kyis mi gos pa zhes mdor bsdus nas bstan to.