byang chub sems dpa’i bsod nams ni tshad med de; de la byang chub sems dpas bgrang ba ’di ’dra bas ’jug par bya’o: sems can thams cad dang, ’das pa dang, da ltar byung ba dang, ma ’ongs pa’i slob pa dang mi slob pa thams cad dang, nyan thos dang rang sangs rgyas thams cad kyi bsod nams ji snyed pa, bsod nams de snyed brgyar bsgyur bas de bzhin gshegs pa’i sku la spu’i khung bu gcig ’grub bo; de bzhin du spu’i khung bu thams cad du gtogs pa’i bsod nams kyi phung po ji snyed pa brgyar bsgyur te, gtan pa med pa’i bsod nams kyi phung po gcig yang dag par bsgrubs pa des de bzhin gshegs pa’i sku la dpe byad bzang po gcig ’grub ste, de bzhin du dpe byad bzang po thams cad re re nas yongs su ’grub bo; dpe byad bzang po thams cad du gtogs pa’i tshad bsod nams kyi phung po ji snyed pa stong du bsgyur te, gtan pa med pa’i bsod nams kyi phung po gcig bsgrubs pa des de bzhin gshegs pa’i sku la skyes bu chen po’i mtshan gcig mngon par ’grub ste, de bzhin du sku la skyes bu chen po’i mtshan sum cu re re nas mngon par ’grub bo; skyes bu chen po’i mtshan sum cur gtogs pa’i bsod nams kyi phung po ji snyed pa stong phrag bcur bsgyur te, gtan pa med pa’i bsod nams kyi phung po gcig yang dag par bsgrubs pa des de bzhin gshegs pa’i sku la smin mtshams kyi mdzod spur skyes bu chen po’i mtshan mngon par ’grub bo; mdzod spur gtogs pa’i bsod nams kyi phung po ji snyed pa de las stong phrag brgyar bsgyur ba’i bsod nams kyi phung po yang dag par bsgrubs pas de bzhin gshegs pa’i sku la dbu’i gtsug tor dang spyi gtsug bltar mi mthong ba skyes bu chen po’i mtshan mngon par ’grub bo; gtsug tor du gtogs pa’i bsod nams kyi phung po de las bye ba phrag brgya stong du bsgyur ba de bas kyang lhag pa’i bsod nams kyi phung po yang dag par bsgrubs pa des de bzhin gshegs pa’i chos kyi dung yongs su ’grub par ’gyur te; chos kyi dung des de bzhin gshegs pa bzhed na ’jig rten gyi khams mtha’ yas mu med pa dag dbyangs kyis go bar mdzad cing chos ’dul ba bsam pa dang dad pa ji lta ba bzhin du sems can thams cad kyi dbang po rnams kyang tshim par mdzad do. byang chub sems dpa’i bsod nams kyi tshogs la ’jug pa ’di thos nas mi skrag, mi dngang zhing dngang bar mi ’gyur ba; ’di ni byang chub sems dpa’i bsod nams kyi tshogs mi zad pa zhes bya’o.

No Tibetan