gtong ba spel ba’i rnam pa dang;

gtong ba ni ji skad du thos pa’i chos rnams ’chad pa’o, spel ba ni gang zag ’ga’ tsam la phyogs gcig tsam du bar ’ga’ ’chad pa ma yin zhing, sems can thams cad la phyogs kun tu rtag tu ’chad pa’o. yang na gtong ba spel ba ni sems kyi rgyan dang, sems kyi yo byad dang, rnal ’byor gyi tshogs dang, don gyi mchog thob par bya ba’i phyir kha na ma tho ba med pa’i sbyin pa sbyin par byed pa’o. de la 1) sus sbyin par byed, 2) su la sbyin par byed, 3) ci zhig sbyin par byed, 4) cis sbyin par byed, 5) ji ltar sbyin par byed, 6) ci’i phyir sbyin par byed ce na? smras pa: 1) sus sbyin par byed pa ni thos pa dang ldan pa gtong ba po’i gang zag gis so. 2) su la sbyin par byed pa ni bzhi la ste, sdug bsngal ba dang, phan ’dogs pa dang, sdug pa dang, khyad par can la sbyin par byed do; de la sdug bsngal ba ni bza’ ba dang bgo ba la sogs pas phongs pa mgon dang skyabs med pa’i bram ze dang tshong pa dang gdol ba la sogs pa’o; phan ’dogs pa ni pha ma dang sdug bsngal dpag tu med par zhugs pa las ’byin pa’i gang zag rnams so; sdug pa ni smos ’drin gang dag de la byams pa’am gtam ’dres pa dang, phebs par smra ba dang, ’grogs bshes rnams so. khyad par can ni gang nyon mongs pa gdul ba la zhugs pa’am, nyon mongs pa btul ba’i ’bras bu la gnas pa rnams so, yang na byang chub sems dpa’i sbyin pa’i gnas ni sems can thams cad de su la sbyin pa ni sems can thams cad la’o. 3) ci zhig sbyin pa ni phyi dang nang gi dngos po’o. 4) cis sbyin pa ni sems mngon par ’du byed pa yid kyi las chags med pa dang gtong ba’i lus dang ngag gi las kyis so. 5) ji ltar sbyin pa ni ma ’ongs pa la blta ba dang ’bras bu mthong ba’i dad pas sbyin par byed pa dang, brnyas pa med par rang gi lag nas sbyin par byed pa’o. 6) ci’i phyir sbyin pa ni sems can thams cad la snying rje’i rgyus sbyin pa ste, sbyin pa de lta bu yang sems can thams cad la snying brtse ba dang ldan pa, longs spyod thams cad rmi lam dang ’dra bar snying po med par ’dzin pa, gzhan gyi don la gtso bor byed pa’i gang zag thos pa dang ldan pa rnams la ’byung gi gzhan las ma yin pas na thos pa ni gtong ba spel ba’i rnam pa zhes bya’o.