de la kun rdzob kyi bden pa bshad par bzhed nas ’jig rten gyi tha snyad dang, yi ge dang, sgra dang, brdas bstan pa ji snyed pa zhes gsungs te, ji snyed pa zhes bya ba’i sgra thams cad dang sbyar te, ’jig rten gyi tha snyad ji snyed pa dang, yi ges bstan pa ji snyed pa dang, sgras bstan pa ji snyed pa dang, brdas bstan pa ji snyed pa zhes bya bar sbyar ro. ji snyed kyi sgra ni ji tsam yod pa’i don drangs te, ’jig rten gyi tha snyad ji tsam yod pa zhes bya ba’i tha tshig go. de la ’jig rten gyi tha snyad ni bstan pa’o; lhag ma rnams ni bshad pa ste: yi ge a dang ka la sogs pa gsung rab kyi lung dang ’brel pa rnams so; sgra ni gsung rab kyi lung dang ’brel pa ’du byed mi rtag ces bya ba la sogs pa’i tshig gi rkang pa rnams so; brda ni don ston par nus shing khong du chud par nus pa’i tshig gi rkang pa rnams so. ji snyed ces bya ba’i tshig gi lung ’ba’ zhig gi ma yin gyi, ’jig rten gyi yig ge dang sgra la sogs pa ci tsam yod pa rnams kyang sdud de, de yang yid kyi dang ngag gi sgo nas ston pa rnam pa gnyis so; de la yid kyis ston pa ni ji ltar brgya byin la yid kyis chos mngon par bshad pa dang, de dag gis kyang rang gi the tshom yid la btags pa dang, lan kyang yid kyis tshigs su bcad pas glan no, mdo de dang de dag las ’byung ba lta bu’o; ngag gis bstan pa ni tshig gi rig byed rnam pa sna tshogs nyan pa’i gang zag rnams kyi rna bar song ba rnams so, de dag gis ni mdor na ’di skad du: gdul bar bya ba’i sems can rnams kyi dbang du ji tsam du tha snyad brjod pa thams cad kun rdzob kyi bden pa yin no, zhes bstan te, de ltar dkon mchog sprin gyi mdo las kyang: rigs kyi bu, chos bcu dang ldan na byang chub sems dpa’ kun rdzob la mkhas pa rnams yin no, bcu gang zhe na? ’di lta ste, gzug su’ang ’dogs la, don dam par na gzugs su’ang mi dmigs shing mi chags so; de bzhin du tshor ba dang, ’du shes dang, ’du byed dang, rnam par shes par kyang ’dogs la, don dam par na rnam par shes par kyang mi dmigs shing mngon par mi chags so zhes bya ba nas sangs rgyas kyi chos rnams su’ang ’dogs la, don dam par na sangs rgyas kyi chos su yang mi dmigs shing mngon par mi chags so; byang chub tu’ang ’dogs la, byang chub sems dpar yang mi dmigs shing de la mngon par mi chags so; rigs kyi bu, de lta bas na ming dang, ’dogs pa dang, tha snyad de ni kun rdzob ces bya ste, kun rdzob kyi chos rnams la don dam pa med kyi, kun rdzob kyi chos med par yang don dam pa bstan par mi nus so zhes gsungs so.