gang bdag dang sems can gzhan gyi ’das pa’i sems dang sems las byung ba dge ba dang mi dge ba rnams rjes su dran pa ste, mi dge ba’i sems dang sems las byung ba rnams dran nas kyang rnam par smod pa dang, dge ba’i sems dang sems las byung ba rnams dran nas kyang byang chub tu yongs su sngo ba, ’di ni ’das pa la mkhas pa’o.

’das pa’i dus la mkhas pa bstan pa’i phyir gang bdag dang sems can gzhan gyi zhes bya ba la sogs pa smos te, dge ba dang, mi dge ba dang, ’brel pa’i sems dang sems las byung ba gang yin pa ni sems dang sems las byung ba dge ba dang mi dge ba rnams zhes bya’o, gang bdag dang sems can gzhan gyis ’das pa’i dus na dge ba ni ’di lta bu zhig byas, mi dge ba ni ’di lta bu zhig byas zhes bdag dang gzhan gyis dge ba dang mi dge ba byas pa ma brjed pa ni rjes su dran pa’o; de tsam gyi ’das pa’i dus la mkhas pa yin nam zhe na? ma yin par bstan pa’i phyir mi dge ba’i sems dang sems las byung ba zhes bya ba la sogs pa gsungs te, ’di yang bdag dang gzhan gyi mi dge ba dang ’brel pa’i sems dang sems las byung ba dran nas zhes bya ba dang sbyar ro; byang chub tu bsngo ba zhes bya ba ni dge ba byas pa rnams bla na med pa’i byang chub thob pa’i rgyur gyur ces smon pa’o.