sa ya etam evaṃ vidvān upāste |
apahate pāpakṛtyām |
lokī bhavati |
sarvam āyur eti |
jyog jīvati |
na asya avarapuruṣāḥ kṣīyante |
upa vayaṃ taṃ bhuñjāmo ’smiṃś ca loke ’muṣmiṃś ca |
ya etam evaṃ vidvān upāste ||

atha hainamanvāhāryapacano ’nuśaśāsa dakṣiṇāgnirāpo diśo nakṣatrāṇi candramā ityetā mama catasrastanavaścaturdhāhamanvāhāryapacana ātmānaṃ pravibhajyāvasthitaḥ tatra ya eṣa candramasi puruṣo dṛśyate so ’hamasmi sa evāhamasmīti pūrvavat | annasambandhājjyotiṣṭvasāmānyāccānvāhāryapacanacandramasorekatvandakṣiṇā(ṇa) diksambandhācca | apāṃ nakṣatrāṇāṃ ca pūrvavadannatvenaiva sambandhaḥ | nakṣatrāṇāṃ candramaso bhogyatvaprasiddheḥ | apānnotpādakatvādannatvaṃ dakṣiṇāgneḥ pṛthivīvadgārhapatyasya | samānamanyat || 1-2 || iti cchāndogyopaniṣadi caturthādhyāyasya dvādaśaḥ khaṇḍaḥ