Nesciebas croesum regem lidocrum ciro paulo ante formidabilem . mox deinde miserandum . traditum flammis rogi . misso cȩlitus imbre defensum? Neuuéist tu dáz croesus . tér in Iidia chúning uuás . sô er míttúndes ciro fórhtlíh uuás . dáz er sâr dáranâh erbármelîh uuórtenêr . únde fóne ímo ín daz fíur geuuórfenêr . fóne ánasláhte errétet uuárd ? Uuánda croesus babiloniis uuíder ciro ze hélfo chám . dánnân geskáh . táz er ín dánnân uertréib . únde er ín sâr nâhfárendo gefîeng . únde ín daz fíur uuárf . ûzer démo ín gót lôsta. Tô ér áber dés cóte nedánchôta . únde er síh rûomda sîn sélbes sâlighéite . tô uuárd . táz ímo tróumda . táz er sáhe iouem síh uuázer ánagîezen . únde dia súnnûn dáz ába-uuísken. Tén tróum ántfrístôta ímo sô sín tóhter . dáz ín cirus ábersólti geuáhen . únde án dáz chrûze hénchen . únde sô ín der régen názti . dáz ín diu súnna trúcchendi . álso iz tára-nâh fûor.