Quid aliud deflet clamor tragoediarum . nisi fortunam indiscreto ictu uertentem felicia regna? Uuáz cháront tragoedie . âne fortunam úndíurlicho stôrenta . gûollichíu rîche . dáz si nehéines mêr nesíhet tánne ánderes ? Tragoedie sínt luctuosa carmina . álso díu sínt . díu sophocles scréib apud grecos . de euersionibus regnorum et urbium . únde sínt uuíderuuártig tien comoediis . án dîen uuír îo gehórên letum únde iocundum exitum. Úns íst áber únchúnt . úbe dehéine latini tragici fúndene uuérdên . sô uuír gnûoge fíndên latinos comicos.