Certe uti arbitror te meminisse . consulare imperium . quod fuerat principium liberatis . ob superbiam consulum . uestri ueteres cupiuerunt abolere . qui prius abstulerant regium nomen de ciuitate . ob eandem superbiam. Iâ uuóltôn íuuere fórderen . álso dû uuâno íh íh kehúgest . uuîo dû lâse . úmbe dîa úbermûoti dero consulum . tîligôn íro ámbaht . táz sélba ámbaht tóh fóre uuás . ánagénne dero libertatis. Táz uuóltôn sie tûon . álso sie óuh íu êr chúninges keuuált tero búrg ába-genâmen. Liuius ságet . uuîo tarquinius superbus . tér ze romo uuás septiums rex a romulo . fertríben uuárd fóne bruto . únde ccollatino . únde triciptino . únde fóne ánderên coniuratis ciuibus . úmbe sîne úbermûoti . fóne déro ér námen hábeta . únde uuîo sie síh éinotôn . fúre die reges consules ze hábenne . dîe iârliches keuuéchselôt uuúrtîn . nîo sîe lángo geuuáltig uuésendo . ze úbermûote neuuúrten. Sô óuh tîe be déro uuîlo begóndôn tyrannidem ûoben . dô uuóltôn sie óuh tén geuuált ferzéren . únde níuuíu ámbáht sképfen . díu man des iâres . mêr dánne éinêst uuéseloti . dáz tîe dâr-ána uuârîn . in déro fríste ze nehéinero insolentia gefáhen nemáhtîn. Úbe potentia dúrh síh kûot uuâre . sô neléideti sî ín sô nîeht. Libertas íst zuískíu . éiníu íst . tíu den mán dés frîen tûot . táz er nîomannes scálh neíst . ánderíu íst . fóne déro si nû chôsôt . tíu ín íoh chúningliches keuuáltes inbíndet . únde ér âne geméine êa . nehéinen geuuíng nehábet.