Car comme uns eust¹ assailli par blasmes et par ledenges un autre homme qui, non mie a l’usage de vraie vertu mais pour orgueilleuse gloire, avoit pris seur soi faussement le nom de philosophe et li eust² dit que il seroit seurs, savoir mon, se cil fust philosophe, c’est a savoir s’il eust souffert et porté debonnairement et en pacience les injures, ce est a dire les hontes et les tors que cil li faisoit et disoit, il prist un petit en soy pacience et, quant il out receu les outragez et les hontez que cil li ot faitez ou ditez, il aussi comme en soi esjoissant dist a la parfin : “N’aperceuz tu ore pas bien, dist il, et entens que je sui philosophe ?