Ubi nunc manent ossa fidelis fabricii?
Uuâr ist sâr nû dáz kráb . tés ketríuuen fabricii ? Uuér uuéiz . uuâr iz sî ? Tíz íst tér dîen bótôn ántuuúrta dero samnitum . dô sie íro gólt púten . únde síh mít tíu lôsen uuóltôn. Ér chád romanos aurum non habere uelle . sed aurum habentibus imperare.
Quid brutus aut rigidus cato?
Uuâr íst nû brutus . álde dér éinríhtigo cato ? Brutus kuuán dia libertatem . populo romano . álso dâr-fóre stât. Rigidus cato uuás sáment pompeio in defensione libertatis . uuíder iulio cȩsare. Únde dô iulius sígo genám . únde pompeius flíhentêr . in egypto erslágen uuárd . tô léita cato fóne egypto daz hére . îo cȩsare nâhfárentemo . állen dén fréisigen uuég . tér dánnân gât ze utica ciuitate. Târ erslûog síh sélben cato . dáz ín cȩsar negefíenge . dánnân héizet er uticensis.