Num enim poteritis superare elephantos mole . tauros robore ? Múgent ír uuérden mêrôren dánne hélfenda . stárcheren dánne fárre ? Num tigres uelocitate preibitis ? Álde snélleren . dánne tigres ? Tigris chît sagitta. Tén námen hábet iz fóne dero snélli . uuánda ímo nîoman indrínnen nemág. Fóne díu scrîbet sanctus ambrosius in exameron . dér ímo sîn uuélf ferstílet . únz er in uuéido íst . tér netrûêt ímo nîeht infáren . únde bedíu hábet er síh keuuárnôt sînero glésinôn bállôn . únde dâr er ín erlóufet . târ uuírfet er ímo éina . sámo-so ér ímo ergébe daz uuélf. In déro ersíhet er síh . únde uuânet táz pílde uuésen sîn uuélf . únde béitet síh táz sóugen. Sô ímo dés nespûot . únde er ímo áber nâhlóufet . sô tríuget er ín mít tero ánderro . únde mít tero dríttûn . únde îo sô . únz er síh kenéret.