Tu conectens mediam animam . resoluis per consona membra . i. conectis et resoluis animam per sonsona membra.Tû gehéftest tia sêla zûo dîen íro gemínnên líden . únde zetéilest sia áfter dîen . íh méino dia súnnûn gânda an míttemo hímele . únde in mínnemen gânda déro septem planetarum. Tîa philosophi hîezen animam mundi . uuánda ál dáz-tir grûet . únde uuáhset . táz túrh-kât sî . álso diu sêla die líde tûot.
Triplicis naturȩ.
Tíu drískero nature íst . uuánda si skînet . prûotet . únde brénnet. Ánderíu fíur brénnent óuh . síu nebrûotent áber nîeht.
Mouentem cuncta . s. ad crescendum.
Állíu díng chícchenta . álso únderen lîchamen diu sêla chícchet.