Non ixionium caput percipitat uelox rota.
Nóh ixioniem netréib ín-in díu daz rád ze tále. Ixion uuás rex laphitarum. Tér éidôta ze héllo dáz er mít iunone slâfen uuólta . bedíu sôlta er éin rád ze bérge trîben . únde dâr-míte ráng er . dés nespûota ímo. Táz íst exemplum déro . dîe mít tero uuérlte ríngent . tíu îo ze tále gât . únde íro sectatores míte-fûoret.
Et tantalus longa siti perditus . spernut flumina.
Únde dér fóre dúrste erchélto tantalus . tér nerûohta dô des uuázeres. Tér gáb sînen sún pelopem fúre frísking ze ézenne diis et deabus . ze besûochenne íro diuinitatem . bedíu stûont er dúrstegêr . ín demo uuázere . únde nemáhta síh is tóh nîo getrénchen. Tér gótes chórôt . témo nesól báz keskéhen.