Aut comitetur iter gelidi senis . miles corusci syderis.
Álde iz síh keébenoe stellę saturni . tíu dero planetarum diu óberôsta íst . únde fóre lázi déro triginta annorum án dîen si den hímel úmbegât . álde óuh táz si bléicha fáreuua hábet . nâh temo álten . únde demo chálten saturno genámôt íst. Íz tánne uuórtenez tero uuârûn súnnûn dégen . i. christi . álso die planetę dero gágenuuértûn súnnûn dégena sínt. Íro milites sínt sie . uuánda sî ín íro férte scáffôt . únde sie getûot stationarias . álde retrogradas . álde anumolas . únde sie getûot zû-ze íro uuúndene . dâr lángo getuélen . êr sie áber ze gesíhte chómên.