20. QUID SIT STADIUM ET OLYMPIAS.
Apud grecos uuás íu éin solemnitas erháuen . dîa sie olympiadem hîezen . fóne olympo monte . dér in macedonia íst . pî démo sie ze êrest uuárd. Tîa ûobtôn sie sîd pî alpheo fluuio archadię . dâr si únder zuískên búrgen rínnet . elidem et pisas . uuánda dâr scôníu fedílde sínt. Tíu solemnitas uuárd úmbe dáz erháuen . dáz târ publica probatio uuúrte . omnium uirtutum. Tánnân hîez tíu probatio grece pancratios. Únde neuuás nîoman in tota grecia . dér síh tehéines tûomliches tínges fermâze . mít tíu er gloriam guúnnen uuólti . ér neskéindi iz târ . ze demo olympiade. Fermáhta er síh ríngennes . sô hîez er grece palestricator . fermáhta er síh féhtennes . mít temo chnúttele . sô hîez er pugil . álde mít suérte . sô hîez er gladiator . álde mít cestibus . táz uuír chédên mít pûsken . sô hîez er agonitheta . i. decertator. Uuólta er ûfen sînero réito strît-spíl ûoben . dáz hîez curule certamen. Uuólta er óugen uuîo er in bóre máhti . dáz téta er gândo úber daz séil . dáz funiambulum hîez. Úbe er óuh sîna snélli skéinen uuólta . dáz téta er lóufendo in stadio . álso dîe tâten ad tumulum anchisę . fóne dîen uirgilius ságet. Stadium hîez sélbez táz spacium . dáz sie lóufen sóltôn . grece genámôtez fóne exercitatione. Tés uuâren . centum uiginti quinque passus . i. nona pars miliarii. Tîen állên uuás târ gágenuuérte fóne frôno íro lôn. Tér lôn hîez grece brabion . latine brauium.