Etenim si de prauitatis infortunio uera conclusimus . infinitam liquet esse miseriam . quam esse constat ęternam. Úbe dáz êrera uuâr íst . táz íh chád . si nequitia miseros facit . miserior necesse et diuturnior nequam . sô íst kuís . táz tíu miseria íst infinita . únde bedíu infelicissima . díu ęterna íst. Úbe diuturna prauitas miserior íst tánne breuis . sô íst . nôte sempiterna béidíu . ióh infinita . ióh infelicissima. Tísa réda féstenôt si fóne díu . sô gnôto . uuánda si sórget . táz er míssetrûuuee. Uuér mág táz sámfto gelóuben . dáz iniqui semper uiuentes . et semper inpuniti . fóne báremo únréhte infelicissimi únde miserrimi uuésen múgîn ? Fóne díu ferním sîn ántuuúrte.