Sed nondum quidem apprehendit crastinum . iam perdidit hesternum. Núbe fóre íst ímo nóh táz mórgeniga . ingángen íst ímo daz késteriga. In hodierna quoque uita. Ióh án demo híutigen lîbe . dér únder demo géstrigen íst . únde únder demo mórgenigen. Non amplius uiuitis. Nelébent ir mêr. Quam in illo mobili et transitorio momento. Tánne án demo stéte-lôsen . únde hína-fértigen stúpfe. Uuír nelébeên nîeht an preterito . nóh an futuro . án demo presenti bírn uuír îo. Nóh státôn nemúgen uuír nîeht an démo sélben. Chómendo ferlóufet iz. Únde úbe iz îoman uuíle zéigôn demo ándermo . dér mág échert éinêst chéden chûmo . íz íst nû . sâr ánderêst chît er nôte . iz uuás nû . úbe er dáz sélba zéigôn sól. Sô getân íst únsêr presens.