’di skad bdag gis thos pa dus gcig na | bcom ldan ’das yul ma ga dh na chos (5) kyi dgon pa na dge sloṅ gi dge ’dun rab tu maṅ ba daṅ | byaṅ chub sems dpa’ saṅs rgyas kyi źiṅ mtha’ yas pa nas ’dus pa tshad med graṅs med pa daṅ | thabs cig tu bźugs te | de’i tshe ’khor der byaṅ chub sems dpa’ ñi ma rab tu snaṅ ba źes bya ba ’dug pa de stan las laṅs (6) te | bcom ldan ’das ga la ba der soṅ nas | bcom ldan ’das la ’di skad ces gsol to ||
bcom ldan ’das bdag de bźin gśegs pa la źu ba mchis te | bcom ldan ’das gnaṅ ba’i skabs dbye bar gsol | bcom ldan ’das kyis bka’ stsal pa | ci daṅ ci ’dod pa dris śig (7) daṅ ṅas bśad par bya’o ||
de nas byaṅ chub sems dpa’ ñi ma rab tu snaṅ bas bcom ldan ’das la ’di skad ces gsol to ||
bcom ldan ’das thabs mkhas pa’i byaṅ chub sems dpas ji ltar śes rab kyi pha rol tu phyin pa la bslab par bgyi | bcom ldan ’das kyis ’di skad ces bka’ (176a1) stsal to ||
rigs kyi bu thabs mkhas pa’i tiṅ ṅe ’dzin ñi ma źes bya ba yod pas de la byaṅ chub sems dpa’ rnams kyis de ltar bslab par bya’o ||
bcom ldan ’das la gsol pa ji ltar bslab par bgyi ||
bcom ldan ’das kyis bka’ stsal pa | rigs kyi bu ’di ltar thabs (2) mkhas pa’i ñi ma’i tiṅ ṅe ’dzin ni rnam pa bdun yod de | gaṅ źen daṅ po ni ’di ltar ñi mas myu gu smin par byed pa ltar byaṅ chub sems dpa’i tiṅ ṅe ’dzin ñi ma lta bus sems can rnams la byaṅ chub kyi myu gu smin par mdzad do ||
gñis pa ni ñi ma ṅa bri bkol med pa ltar byaṅ chub sems dpa’i tiṅ (3) ṅe ’din gyi thugs rje ni sems can thams cad la sñoms par mdzad do ||
gsum pa ni ñi mas ñal ñil sreg pa ltar byaṅ chub sems dpa’i lhag mthoṅ gi śes rab kyis ñon moṅs pa’i ñal ñil rnams sreg par byed do ||
bźi pa ni ñi mas ’khyags pa ’ju ba ltar byaṅ chub sems dpa’i tiṅ ṅe ’dzin (4) gñen po ye śes daṅ ldan pas ñon moṅs pa ’khyags pa lta bu ’ju bar byed do ||
lṅa pa ni ñi mas mun pa sel ba ltar byaṅ chub sems dpa’i so sor kun tu rtog pa’i ye śes kyis gzuṅ ba daṅ ’dzin pa’i mun pa sel bar byed do ||
drug pa ni ñi mas gliṅ bźi ’khor ba ltar byaṅ chub sems dpa’i (5) phrin las phun sum tshogs pas sdug bsṅal gyi chu bo bźi las thar bar mdzad do ||
bdun pa ni ñi mas kun la sñoms par dro ba bźin du byaṅ chub sems dpa’i spyod pa phun sum tshogs pas sems can thams cad la rab tu dga’ bar mdzad pa’i thabs ni dro ba’i las lta bu’o ||
gźan yaṅ rigs kyi bu (6) byaṅ chub sems dpa’ rnams kyis śes rab kyi pha rol tu phyin pa la bslab par bya ste | des ’di ltar chos thams cad raṅ bźin med pa daṅ | mtshan ma med pa daṅ | mtshan ma thams cad daṅ rab tu bral ba daṅ | dṅos po med pa daṅ | dṅos po thams cad daṅ bral ba daṅ | gaṅ zag pa med pa daṅ | gaṅ zag pa (7) thams cad daṅ bral ba daṅ | ṅo bo ñid kyis stoṅ pa ñid la bslab par bya’o ||
rigs kyi bu chos ñid daṅ chos kyi dbyiṅs daṅ | de bźin ñid daṅ | yaṅ dag pa’i mtha’ daṅ | ma nor ba de bźin ñid daṅ | gźan ma yin pa de bźin ñid daṅ | bden pa daṅ de kho na’i don la byaṅ chub sems dpas bslab par bya’o ||
de nas (176b1) bcom ldan ’das kyis byaṅ chub sems dpa’ ñi ma rab tu snaṅ ba la ’di skad ces bka’ stsal to ||
rigs kyi bu byaṅ chub sems dpa’ sa yaṅ chos thams cad mṅon par ’du bya ba med pa daṅ | skye ba med pa la bslab par bya’o ||
rigs kyi bu chos thams cad raṅ bźin gyis rnam par dag pa la bslab par bya’o ||
(2) gzugs la sogs pa’i chos thams cad kyaṅ raṅ bźin gyis stoṅ par śes par bya’o ||
ṅo bo ñid kyis dben par śes par bya’o ||
rigs kyi bu gaṅ dag gis śes rab kyi pha rol tu phyin pa’i mdo ’dzin par byed na de las kyi sgrib pa byaṅ bar ’gyur ro ||
de bsod nams kyi tshogs skye bar ’gyur ro ||
śes (3) rab kyi tshogs tshad med pa daṅ ldan par ’gyur ro ||
dran pa daṅ ldan pa daṅ | tshul khrims daṅ ldan pa daṅ | tiṅ ṅe ’dzin daṅ ldan par ’gyur ro ||
rigs kyi bu gźan yaṅ byaṅ chub sems dpa’ rnams kyis śes rab kyi pha rol tu phyin pa la bslab par bya’o ||
de nas bcom ldan ’das kyis de’i tshe tshigs su (4) bcad pa ’di dag gsuṅs so ||
maṅ thos dam pa’i chos la brtson ||
sems can kun la byams par ldan ||
brtson ’grus go cha phun sum tshogs ||
bdag daṅ gźan gyi don la mos ||
bsam gtan tiṅ ’dzin bsgom la brtson ||
bdag daṅ sems can ’du śes med ||
yaṅ dag theg pa’i lam du źugs ||
sṅon gyi (5) rgyal sras de ltar spyod ||
mkhas pas ma nor de bźin slobs ||
bcom ldan ’das kyis de skad ces bka’ stsal pa daṅ | byaṅ chub sems dpa’ ñi ma rab tu snaṅ ba daṅ | lha daṅ mir bcas pa’i ’jig rten yi raṅs te bcom ldan ’das kyis gsuṅs pa la mṅon par bstod do ||
