(142a4) || rgya gar skad du | ārya kauśikapradzñāpāramitā nāma | bod skad du | ’phags pa śes rab kyi pha rol tu (5) phyin pa kau śi ka źes bya ba | saṅs rgyas daṅ | byaṅ chub sems dpa’ thams cad la phyag ’tshal lo || ’di skad bdag gis thos pa dus gcig na | bcom ldan ’das rgyal po’i khab na bya rgod kyi phuṅ po’i ri la dge sloṅ gi dge ’dun chen po daṅ | byaṅ chub sems (6) dpa’ ’bum phrag du ma thams cad kyaṅ gźon nur gyur pa śa stag daṅ thabs cig tu bźugs te | de nas bcom ldan ’das kyis lha’i dbaṅ po brgya byin la bka’ stsal pa | kau śi ka de la śes rab kyi pha rol tu phyin pa’i don ni ’di yin te | śes rab kyi pha rol tu (7) phyin pa ni gñis su blta bar mi bya | gñis ma yin par yaṅ ma yin | mtshan mar ma yin | mtshan ma ma yin par yaṅ ma yin blaṅ bar yaṅ ma yin | dor bar yaṅ ma yin | bsnan par ma yin | bsnan pa med par yaṅ ma yin | kun nas ñon moṅs par ma (142b1) yin | kun nas ñon moṅs pa ma yin par yaṅ ma yin | rnam par byaṅ bar ma yin | rnam par byaṅ ba ma yin par yaṅ ma yin | spaṅ bar ma yin | spaṅ ba ma yin par yaṅ ma yin | gnas su ma yin | gnas su ma yin par yaṅ ma yin | sbyor bar ma yin | (2) sbyor ba ma yin par yaṅ ma yin | ’brel par ma yin | ’brel bar ma yin par yaṅ ma yin | rkyen du ma yin | rkyen ma yin par yaṅ ma yin | chos su ma yin | chos ma yin par yaṅ ma yin | de bźin ñid ma yin | de bźin ñid ma yin par yaṅ ma (3) yin | yaṅ dag pa’i mthar ma yin | yaṅ dag pa’i mthar ma yin par yaṅ ma yin no || kau śi ka de bźin du śes rab kyi pha rol tu phyin pa’i don ni ’di lta ste | chos thams cad mñam pa ñid kyi phyir śes rab kyi pha rol tu phyin pa ñid mñam mo || chos thams cad zab pa’i (4) phyir śes rab kyi pha rol tu phyin pa zab bo || chos thams cad dben pa’i phyir śes rab kyi pha rol tu phyin pa dben no || chos thams cad g-yo ba med pa’i phyir śes rab kyi pha rol tu phyin pa g-yo ba med do || chos thams cad rlom sems med pa’i phyir śes rab kyi pha rol (5) tu phyin pa rlom sems med do || chos thams cad ’jigs pa med pa’i phyir śes rab kyi pha rol tu phyin pa ’jigs pa med do || chos thams cad bag tsha ba med pa’i phyir śes rab kyi pha rol tu phyin pa bag tsha ba med do || chos thams cad ro gcig pa’i phyir śes rab kyi pha rol tu phyin pha rol (6) gcig go || chos thams cad skye ba med pa’i phyir śes rab kyi pha rol tu phyin pa skye ba med do || chos thams cad ’gags pa med pa’i phyir śes rab kyi pha rol tu phyin pa ’gags pa med do || chos thams cad nam mkha’ lta bu’i phyir śes rab kyi pha rol tu phyin pa nam mkha’ (7) lta bu’o || gzugs mu med pa’i phyir śes rab kyi pha rol tu phyin pa mu med do || de bźin du tshor ba daṅ | ’du śes daṅ | ’du byed rnams daṅ | rnam par śes pa mu med pa’i phyir śes rab kyi pha rol tu phyin pa mu med do || sa’i khams mu med pa’i phyir śes rab kyi pha rol tu | (143a1) phyin pa mu med do || de bźin du chu’i khams daṅ | me’i khams daṅ | rluṅ gi khams daṅ | nam mkha’i khams daṅ | rnam par śes pa’i khams mu med pa’i phyir śes rab kyi pha rol tu phyin pa mu med do || ri rab mu med pa’i phyir śes rab kyi pha rol tu (2) phyin pa mu med do || rgya mtsho mu med pa’i phyir śes rab kyi pha rol tu phyin pa mu med do || rdo rje mñam pa’i phyir śes rab kyi pha rol tu phyin pa mñam mo || chos thams cad dbyer med pa’i phyir śes rab kyi pha rol tu phyin pa dbyer med do || chos thams cad kyi ṅo bo ñid dmigs su (3) med pa’i phyir śes rab kyi pha rol tu phyin pa’i ṅo bo ñid dmigs su med do || chos thams cad bsal ba med par mñam pa’i phyir śes rab kyi pha rol tu phyin pa bsal ba med par mñam mo || chos thams cad byed pa med pa’i phyir śes rab kyi pha rol tu phyin pa byed pa med do || (4) chos thams cad bsam gyis mi khyab pa’i phyir śes rab kyi pha rol tu phyin pa bsam gyis mi khyab bo || de bźin du sbyin pa’i pha rol tu phyin pa daṅ | tshul khrims kyi pha rol tu phyin pa daṅ | bzod pa’i pha rol tu phyin pa daṅ | brtson ’grus kyi pha rol tu phyin pa daṅ | bsam (5) gtan gyi pha rol tu phyin pa daṅ | śes rab kyi pha rol tu phyin pa daṅ | thabs kyi pha rol tu phyin pa daṅ | smon lam gyi pha rol tu phyin pa daṅ | stobs kyi pha rol tu phyin pa daṅ | ye śes kyi pha rol tu phyin pa ’khor gsum yoṅs su dag pas mu med pa’i phyir śes rab kyi (6) pha rol tu phyin pa mu med do || śes rab kyi pha rol tu phyin pa źes bya ba ni ’di ltar stoṅ pa ñid bcwa brgyad de | ’di lta ste | naṅ stoṅ pa ñid daṅ | phyi stoṅ pa ñid daṅ | phyi naṅ stoṅ pa ñid daṅ | stoṅ pa ñid stoṅ pa ñid daṅ | chen po stoṅ pa ñid daṅ | don dam pa stoṅ pa ñid daṅ | ’dus (7) byas stoṅ pa ñid daṅ | ’dus ma byas stoṅ pa ñid daṅ | mtha’ las ’das pa stoṅ pa ñid daṅ | thog ma daṅ tham med pa stoṅ pa ñid daṅ | dor ba med pa stoṅ pa ñid daṅ | raṅ bźin stoṅ pa ñid daṅ | chos thams cad stoṅ pa ñid daṅ | raṅ gi mtshan ñid stoṅ pa ñid daṅ | (143b1) mi dmigs pa stoṅ pa ñid daṅ | dṅos po med pa stoṅ pa ñid daṅ | ṅo bo ñid stoṅ pa ñid daṅ | dṅos po med pa’i ṅo bo ñid stoṅ pa ñid de | mdor na stoṅ pa ñid ’di ni śes rab kyi pha rol tu phyin pa źes bya’o || skar ma rab rib mar me daṅ || sgyu ma zil pa chu bur daṅ || (2) rmi lam glog daṅ sprin lta bu || ’dus byas de ltar blta bar bya || na mo bha ga ba ba tyai ārya pradzñāpāramitā yai | om dhihhriHśri śru ti smṛi ti ma ti ga ti bi dza ye sw h | ’gag pa med ciṅ skye med la || chad pa med ciṅ rtag pa med || tha dad don min don gcig min || ’oṅ ba med (3) ciṅ ’gro med la || spros pa źi bas źi ba yi || rten ciṅ ’brel bar ’byuṅ ston pa || rdzogs pa’i saṅs rgyas gaṅ yin pa || smra mchog de la phyag ’tshal lo || bcom ldan ’das kyis de skad ces bka’ stsal nas | tshe daṅ ldan pa śa ra dwa ti’i bu daṅ | lha’i dbaṅ (4) po brgya byin daṅ | dge sloṅ de dag daṅ | byaṅ chub sems dpa’ de dag daṅ | lha daṅ | mi daṅ | lha ma yin daṅ | dri zar bcas pa’i ’jig rten yi raṅs te | bcom ldan ’das kyis gsuṅs pa la mṅon par bstod do || ||
